Concentración de condena na Xunta en repulsa ao crime cometido en Gondomar

Concentración de condena en repulsa ao crime cometido en Gondomar, cun minuto de silencio, que tivo lugar en San Caetano, coa participación do presidente da Xunta, Alberto Núñez Feijóo, e tamén nas delegacións territoriais.

A Xunta de Galicia expresa a súa máis enérxica condena pola morte de Soledad Rey, presuntamente asasinada pola súa parella. O Goberno galego manifesta a súa consternación ante este crime e amosa as súas condolencias á familia e, á espera, de que a investigación confirme se é un caso de violencia de xénero, fai un chamamento a toda a sociedade para que se rebele contra esta repudiable lacra.

Así mesmo, a Xunta fai un chamamento para que as persoas que están sendo vítimas de malos tratos denuncien para que así se lles poidan prestar a axuda necesaria para rachar coa situación de violencia na que están inmersas. Teñen á súa disposición un amplo abano de medidas: protección policial, axudas económicas, asesoramento e información, apoio psicolóxico ou a rede de casas de acollida.

Neste sentido, hai que lembrar que as vítimas de violencia de xénero tamén poden acudir ao teléfono da muller 900400273 ou o 016, un servizo gratuíto que garante a confidencialidade xa que non queda pegada na factura telefónica.