Os cinco axentes da brigada de prevención e extinción de incendios forestais chegan a Baiona tres meses máis tarde, en outubro, en lugar de facelo na época de maior risco incendiario como é o verán. O motivo, segundo denuncian desde o Partido Popular, que o goberno local esqueceuse de tramitar a súa solicitude á Xunta. “É inxustificable e moi grave que un Concello esquézase de solicitar unha axuda destinada a previr incendios forestais que poden chegar a ser dramáticos. Máis aínda cando é un trámite que se realiza cada ano ás portas do verán”, lamentan desde o grupo municipal popular que cualifican de “caos” a xestión do tripartito.
Precisamente, os cinco efectivos (un xefe de brigada, un peón condutor e tres peóns forestais) comezarán mañá a traballar cando se cumpren tres anos de que a comarca do Val Miñor, e particularmente Baiona que resultou moi afectada, fóra pasto das chamas na onda de incendios intencionados que azoutou o sur da área de Vigo. Isto, a xuízo dos populares, debería de facer que teñamos moi presente a importancia de tramitar subvencións como esta que permite que as brigadas poidan traballar no noso municipio na data en que debe facerse e non en pleno outono.
Que o Concello tivese esta nova “falta de previsión” significa que durante todo o verán Baiona estivo “desprotexida” xa que todas as tarefas de prevención, que debían facerse a principios da etapa estival tales como devasas ou limpeza de montes para evitar a propagación das chamas, non se realizaron e será na segunda quincena de outubro, cando o risco é mínimo pola caída das temperaturas e a chegada das choivas de outono, cando leven a cabo. “É un sen sentido”, consideran os populares que se preguntan “cantas máis subvencións deixará escapar este Alcalde por non tramitalas ou facelo a destempo”.
