O alcalde, Carlos Gómez, xunto co concelleiro de Seguridade, Óscar Martínez, deron a benvida aos sete auxiliares da Policía Local de Baiona, que comezaron a prestar os seus servizos esta fin de semana. Como é sabido a Real Vila durante a época estival rexistra un importante aumento de poboación tanto fixa como flotante, por iso faise necesario ampliar o persoal habitual composto por once axentes, un oficial e un Inspector-Xefe.
As súas funcións principais son de apoio e auxilio aos membros da Policía Local, vixilancia e control do tráfico e seguridade en espazos públicos, ademais supón un reforzo á hora de controlar o cumprimento das normas establecidas para evitar a propagación do Covid-19.
Pola súa banda, o alcalde, Carlos Gómez, destacou a importancia de poder contar con persoal de apoio para levar a cabo estes labores, tendo en conta que durante a época estival prodúcese un notable incremento poboacional no municipio. Esta incorporación servirá para reforzar o persoal existente ata outubro, aínda que a intención do goberno local é reforzar o persoal actual coa incorporación de novos axentes ao corpo.
O concelleiro de Seguridade asegura que as novas incorporacións permitirán cumprimentar o servizo actual nas tarefas de control de tráfico, seguridade viaria e seguridade cidadá.
