Sanxenxo leva semanas traballando nun sistema que permita a veciños e visitantes gozar dunha praia tan fermosa e concorrida como é Silgar, pero garantindo a máxima seguridade sanitaria e respectando as distancias que recomendan os expertos sanitarios. A solución que se propón consiste en dividir a praia en 5 sectores que contarán con persoal para facilitar aos usuarios a súa localización, mantendo en todo momento os protocolos de seguridade sanitaria.
Cada sector terá unha cor diferente e estará formado por centos de cuadrículas de 3×3 metros, que en función do número de persoas poderanse ampliar facilmente mediante a agregación de 2, 3 ou 4. As cuadrículas estarán formadas por estacas de madeira cravadas na area e unidas por unhas cordas que se poderán recolocar con facilidade en función do número de persoas.
A nova ordenación da praia reserva 2 franxas lonxitudinais para albergar usos e servizos:
• Unha franxa entre o mar e a primeira liña de cuadrículas que será unha zona de paseo e xogos para nenos. Terá un mínimo de 7 metros de ancho na pleamar, superando os 30 metros coa marea baixa.
• Na zona traseira, entre a última liña de cuadrículas e o muro do Paseo de Silgar, se reserva unha franxa de 8 metros para distintos servizos como baños, módulo de salvamento e zona recreativa.
• A praia dispoñerá de 4 accesos perpendiculares de 6 metros de ancho que irán desde o muro ata a primeira liña de praia. Cada dúas liñas de cuadrículas haberá corredores paralelos de 3 metros de ancho para facilitar a entrada e saída dos bañistas. Cada cuadrícula sepárase das contiguas por un espazo de 1,5 metros polo que en ningún caso poderase transitar.
Capacidade por cuadrículas
As recomendacións sanitarias fixan un espazo de seguridade de 4 metros cadrados por persoa, que en Silgar supérase oscilando entre os 4,5 e os 5 metros por persoa. Todas as cuadrículas son de 9 m2, pero por cada unha que se agregue gáñanse 4,5 m2 a maiores que corresponde ao espazo de seguridade que as separa.
• 1 cuadrícula (9 m2) 2 persoas
• 2 cuadrículas (22,5 m2) 5 persoas
• 3 cuadriculas (36 m2) 8 persoas
• 4 cuadrículas (49,5 m2) 12 persoas
En total a praia de Silgar terá 780 cuadrículas o que supón un aforo que pode oscilar entre as 1.560 e as 2.340 persoas, o que significa entre un 50 e un 75% do aforo respecto a veráns anteriores. En resumo, Sanxenxo quere facer todo o que estea na súa man para ofrecer as maiores garantías de seguridade e hixiene aos seus visitantes. “Traballamos para que sentan tan seguros e tan ben atendidos como nas súas casas”, asegura o alcalde, Telmo Martín.
Podería esta idea trasladarse aos municipios costeiros do Val Miñor, Baiona e Nigrán?.
🎥 VIDEO: Plan de adaptación e seguridade da praia de Silgar en Sanxenxo.
Publicado por Valmiñortv.com – O diario dixital de Baiona, Gondomar e Nigrán en Miércoles, 6 de mayo de 2020