Daniel Pazó resultou este domingo vencedor da III edición do Trail Adventure Muíños do Folón celebrado no Rosal con cifras históricas de participación. O baionés foi un dos máis de 800 inscritos de 8 provincias diferentes e cunha representación moi alta de deportistas portugueses. A proba, convertida xa nun clásico autonómico do calendario do Trail Running, foi ademais a primeira proba da Pontevedra Trail League.
Pazó impúxose na proba Advance de 21 km, completando o percorrido en 2:03:14. Case cinco minutos despois, en 2:08:07, cruzaba a meta Luis Enrique Martínez Comesaña, e pechando o podio, César Santos Barciela, terceiro clasificado cun tempo de 2:09:33.
O Trail Adventure Muíños do Folón é, sen dúbida, a combinación perfecta de deporte, patrimonio histórico, natural e turismo, xa que permite a todas as persoas participantes combinar a práctica dunha das súas paixóns deportivas co desfrute dunha contorna e un lugar máxico e fermoso como son os muíños do Folón e do Picón. Tamén houbo unha andaina de 10 km para todos os públicos e unha proba máis curta, de 12 km.
