Gondomar conta con presentar en marzo o seu primeiro orzamento municipal tras oito anos acumulando prórrogas. Polo momento o departamento de Intervención traballa paralelamente na recapitulación de toda a documentación necesaria do exercicio pasado para introducir no documento, así como no propio borrador que será entregado ao alcalde Paco Ferreira.
Trátase pois, do paso inicial para que a localidade poida contar cun plan económico adaptado ás necesidades actuais do municipio, e que leva desde 2012 variándose a base de modificacións de crédito. Unha vez reciba o bosquexo será o momento de axustar os diferentes capítulos comezando polo primeiro, os relativo a gastos de persoal e onde terán que facer o cálculo en base aos soldos actuais, así como as subidas salariais. Unha vez finalizado proseguirán no que Ferreira denomina “vontade política”, que non é outra que a designación de partidas para as diferentes concellerías. A pesar de que se trata dun punto no que terá que traballar sobre o papel, o rexedor adiantou que contará cun marcado acento social co que cabe esperar que existirán diferenzas substanciais sobre o documento orixinal. “Aumentamos un 40% o gasto en Benestar Social e Fogar desde hai 8 anos e todo isto agora temos que reflectilo no plan”, explicou. Con todo todo apunta a que a contía total do orzamento apenas terá variacións respecto ao do 2012 e manterase na franxa dos sete millóns aínda que cunha orientación moi diferente á establecida polos populares fai oito anos.
Desta maneira o municipio máis extenso da comarca verá desbloqueada a súa situación cun documento que en palabras do alcalde “estará actualizado ás necesidades reais do 2020”. Por outra banda Ferreira adiantou que pretende converter ao documento nun de “corte participativo” co fin de lograr a súa aprobación por unanimidade en sesión plenaria.
O certo é que nos últimos anos o municipio gondomareño viuse inmerso nun panorama de inestabilidade política marcada polas convulsións e escándalos que levaron ao banco a varios políticos, o que nun primeiro momento non lles impediu aprobar un orzamento en 2012. Un feito que precisamente se traduciu a posteriori nas urnas cunha moción de censura, pactos e coalicións pouco frutíferas e un municipio fragmentado politicamente falando, o que favoreceu idas e vindas do PP ata que en 2015 Paco Ferreira arrebatou o bastón de mando ao popular Fernando Guitián para gobernar en coalición con CABE e MM. Un tripartito que se saldou cun goberno socialista en minoría con tan só catro concelleiros do PSOE ao mando. O primeiro en abandonar o barco foi o de Pauliño del Río, CABE, aos seis meses, e en 2015 os de Araújo, cesados polo rexedor socialista. Oito anos despois os indicios marcan estabilidade coa maioría absoluta lograda por Ferreira en maio de 2019, o que no peor dos casos permitiralle aprobar o orzamento sen necesidade de apoios.
