Baiona recibe en FITUR o premio “Quality Coast” como destino sustentable internacional

Baiona recibiu onte en FITUR o premio “Quality Coast”, que o recoñece como destino sustentable internacional. Foi recollido polo Alcalde, Carlos Gómez, durante o XII Foro de Turismo Responsable, organizado polo Centro Español de Turismo Responsable (CETR) e a Asociación Española de Profesionais do Turismo (AEPT).

No seu discurso tras a recollida da bandeira e diploma acreditativo, o Alcalde comentou que “a sustentabilidade é o eixo principal da estratexia local e supón unha responsabilidade e un reto. Continuaremos coas liñas de protección ao medioambiente, aos nosos recursos naturais e culturais ou a aposta pola calidade turística pero fomentaremos a participación cidadá para darlle voz á cidadanía e facerlles protagonistas nas accións que pretendemos levar a cabo”.

“Non deixaremos de divulgar os nosos recursos costeiros pero faremos especial fincapé en potenciar o noso rural e os nosos montes involucrando á iniciativa privada e asociacións para que, entre todos, consigamos que a nosa natureza permítanos atallar a estacionalidade turística, tanto temporal como xeográfica, e potencie un desenvolvemento económico local e sustentable”, engadiu Gómez.

O rexedor sinalou ademais que outro eixo fundamental será a aposta social. “Continuaremos loitando pola igualdade, por erradicar a violencia de xénero, pola accesibilidade para todos e todas ou pola creación de emprego pero, sobre todo, potenciaremos a participación cidadá nas decisións municipais”.

Finalmente, asegurou que “seguiremos traballando na mellora da sustentabilidade municipal, no amplo sentido da palabra, para que Baiona siga sendo recoñecido como un dos destinos sustentables do mundo”.

Durante o acto tamén recibiron o premio outros municipios como Noja (Cantabria), Torroella de Montgrí e Bergueda (Cataluña) e o Parque Nacional das Illas Atlánticas de Galicia.

Anuncios