Este xoves, día 9 de xaneiro, a partir das once da mañá poñerase en marcha no municipio de Gondomar un novo centro de compostaxe comunitaria, que se situará no Parque das Ánimas, converténdose así no segundo destas características que o goberno local, que preside Paco Ferreira, pon en marcha na localidade.
A iniciativa, que se enmarca dentro do Plan Revitaliza da Deputación Provincial de Pontevedra, “é un paso máis na aposta polo medio ambiente do noso executivo, así como da nosa implicación na loita contra o cambio climático, na que queremos implicar a todos os veciños e veciñas”, manifestou o rexedor.
Con motivo da posta en marcha deste novo centro de compostaxe desprazaranse este xoves ata Gondomar “mestres composteiros” encargados do funcionamento do centro, que explicarán o proceso de compostaxe, cales son as súas vantaxes e de que maneira pode participar toda a cidadanía, resolvendo calquera dúbida que poida xurdir.
