Preto de 500 persoas participarán na Cabalgata de Reis de Gondomar

Todo preparado en Gondomar para recibir ás súas Maxestades os Reis Magos de Oriente este próximo domingo, día 5 de xaneiro, na Praza da Paradela, onde saudarán aos nenos e nenas que se acheguen ata alí, e recollerán as cartas de última hora que aínda non depositasen na caixa de correos real.

Os tres Magos sentarán nos seus tronos tras percorrer o centro urbano do municipio a bordo das súas carrozas, na tradicional Cabalgata de Reis que partirá ás 18:00 horas desde a rotonda situada xunto ao Cuartel da Garda Civil, para baixar pola rúa Eduardo Iglesias, percorrer Elduayen e Diego Sarmiento de Acuña ata o Centro Neural.

Preto de 500 persoas formarán a comitiva da Cabalgata, que abrirá a Rondalla do Centro Cultural “A Merced” de Chaín, á que se sumarán as tres asociacións de danza do municipio, a Asociación Carnavales de Mañufe e o Centro Cultural de Chaín, escoltados todos eles pola Policía Local.

A literatura, a maxia dos libros e todas as historias que nas súas páxinas esconden, será a temática elixida para o desfile, seguindo o lema “Escribe o teu Nadal” elixido este Nadal en Gondomar, facendo unha chiscadela especial este domingo ao conto de “El Cascanueces”.

O mesmo domingo día 5 os visitantes e veciños de Gondomar poderán volver gozar do Belén Vivente que se mostrará no Parque da Coelleira, a partir das 16:00 horas.