A Consellería de Infraestruturas e Mobilidade, a través de Augas de Galicia, vén de licitar o servizo de vixilancia das presas de Eiras, Baiona e Con, cun investimento de case 267.000 euros.
Este contrato, cunha vixencia de dous anos, enmárcase no mantemento que a Xunta vén realizando nas presas da súa titularidade.
As presas de Eiras, Baiona e Con, destinadas ao abastecemento de auga potable das áreas de Vigo, Baiona e Vilagarcía de Arousa, respectivamente, son de titularidade autonómica.
Os datos obtidos na vixilancia das presas permiten facer o seguimento da súa evolución, detectar anomalías ou fallos no seu comportamento e, no seu caso, poder establecer as actuacións preventivas e correctoras para manter as infraestruturas hidráulicas en bo estado.
Os traballos obxecto do contrato incluirán a realización para cada presa dun plan detallado de toma de lecturas en instrumentos de auscultación e en aforadores dos caudais evacuados pola rede de drenaxe.
O contrato tamén contempla a análise periódica das lecturas obtidas na auscultación e na inspección dos encoros, que será remitida a Augas de Galicia, así como as visitas e supervisións rutineiras ás presas e ás súas instalacións.
A empresa adxudicataria tamén deberá levar a cabo a redacción dun informe final anual recompilando as medicións efectuadas, analizando e comparando os datos obtidos e concluíndo o comportamento e o estado da seguridade da presa. Esta información tamén será trasladada á Consellería de Infraestruturas e Mobilidade.
