Gringas solidarias na Praia de Patos para axudar ás mulleres indíxenas mexicanas

Todos os martes do mes de agosto, os fans dos tacos mexicanos poderán degustar as “gringas” do Chac Mool, pero cun fin solidario. O proxecto chamado “Martes de Gringa Solidaria” é unha actividade altruísta que desenvolve Chac Mool Taquería Mexicana para apoiar os diferentes proxectos de Zihuame Mochilla A.C., unha asociación mexicana que traballa para diminuír os índices de marxinación e pobreza das mulleres e as poboacións indíxenas no seu país. Por cada gringa vendida durante os martes de agosto, destinarase o 50%, para facer un donativo a fin de mes, co monto total.

O restaurante, que habitualmente pecha os martes por descanso do persoal, puxo en marcha esta iniciativa, que se realizará aproveitando que o local pecha ese día. Na terraza, instalarase o carriño de tacos, co que fan servizo de cátering, para recadar e “dar a coñecer a importante actividade que entidades como Zihuame Mochilla fan no noso país, en beneficio dunha poboación marxinada e discriminada, como son os indíxenas”, explica Alain Gutiérrez, un dos impulsores desta actividade.

En horario de 19:00 a 23:00 horas, os catro martes do mes de agosto, os veciños e veraneantes da Praia de Patos, en Nigrán, poderán colaborar con este proxecto, ao mesmo tempo que degustan o que xa se converteu nun dos pratos favoritos dos asiduos á taquería.

Que é a gringa?

É un dos tacos “estrela” en Chac Mool Taquería Mexicana e está feita cunha tortilla de trigo, queixo tostado á prancha e carne ao pastor, un tipo de carne de porco, adobada ao estilo tradicional mexicano.

Zihuame Mochilla

É unha asociación civil que busca mellorar as condicións de vida para abater índices de discriminación, marxinación e pobreza das mulleres indíxenas, así como o rescate e preservación das manifestacións culturais das súas comunidades. Realizan un labor social moi importante, xa que -segundo a Enquisa Nacional de Discriminación 2017-, en México 4 de cada 10 indíxenas sufriu insultos ou burlas polo simple feito de ser indíxena; 5 de cada 10 considera que os seus dereitos respéctanse pouco ou nada e a 4 de cada 10 negáronlle información sobre algún trámite, servizo ou programa de goberno.