Conclúe no Talaso Atlántico o curso de oncoloxía integrativa

O curso de oncoloxía integrativa organizado por Talaso Atlántico e a Universidade de Santiago de Compostela concluíu esta tarde co compromiso de divulgar e traballar para crear un modelo máis humanístico para abordar esta enfermidade. O encontro reuniu a 23 expertos, dos máis destacados de España, en epidemioloxía, coidados oncolóxicos, atención primaria, así como profesionais doutras disciplinas responsables de programas e iniciativas que apostaron por unha medicina máis humanística. No seminario subliñouse a importancia de potenciar a creación de equipos humanos multidisciplinares de atención a enfermos de cancro así como de priorizar o papel da Atención Primaria.

Ademais, o curso serviu na súa xornada de hoxe para poñer as bases da primeira rede de colaboración de organizacións especializadas en coidados a pacientes oncolóxicos. Nesta rede atópanse colectivos como Abeiratúa, unha organización sen ánimo de lucro centrada en como debe ser o exercicio físico para este tipo de pacientes, a iniciativa da Universidade de Santiago e o Concello de Oleiros, Móvete Máis; a denominada Arte, emoción e movemento do Chuac da Coruña, ou Almazén de Yoga, centro cun programa específico de iogaterapia.

Polo curso de oncoloxía celebrado esta semana en Oia pasaron Marina Pollán, directora do Centro Nacional de Epidemioloxía do Instituto de Saúde Carlos III, José María Pumarega, do grupo de Recerca en Epidemioloxía Clínica e Molecular do Cancro do Instituto Hospital do Mar de Investigacións Médicas ou Francisco Barón Duarte, ex-coordinador do Plan Galego de Coidados Paliativos e coautor do libro Bioética e oncoloxía.

Anuncios