Nigrán resolverá en dous meses as verteduras de pluviais aos colectores do Muíños

O Concello de Nigrán vén de adxudicar a Sodein Soluciones Integrales por 103.000 € os traballos para reducir as verteduras de pluviais aos colectores de residuais que discorren paralelos ao río Muíños, xa que nos momentos de moita choiva prodúcese o desbordamento das arquetas no tramo final do río. As obras teñen un prazo de execución de dous meses e se prevé que se inicien nas vindeiras semanas. Paralelamente, estanse a executar por 510.000 euros os traballos de bioenxeñería para acondicionar as marxes do río ante a gran degradación que sufre como consecuencia da presión urbanística e que afecta tamén directamente á conservación do sistema dunar de Praia América. En total, ambos traballos, a cargo do arquitecto Ángel Santorio, suman un investimento de 613.000 € e teñen como obxectivo devolver ao río Muíños ao seu estado natural.

O actual proxecto busca, en definitiva, executar medidas para a redución de verteduras de augas pluviais en redes unitarias, con intervencións encamiñadas a reducir as incorporacións de augas naturais aos colectores de residuais, minimizando o volume e frecuencia dos mesmos nos momentos de choiva abundante. Isto evitará que desborden as arquetas no tramo final e que a depuradora non reciba un caudal de auga excesivo para o seu correcto tratamento. Así, os traballos inclúen a clausura ou reparación de determinados pozos, instalación de aliviadoiros e acondicionamento paisaxístico na contorna dos que producen maior impacto visual.