Segunda praza para Alberto Meira no Rally Botafumeiro

Ao longo deste fin de semana, tivo lugar a sexta cita do Campionato Galego de Rallies. Da man de Escudería Santiago, regresaba o emblemático Rally Botafumeiro, que celebraba a súa edición vixésimo sexta cunha formulación sumamente ambiciosa, case máis próximo ao habitual en citas do Campionato de España, que nunha proba rexional.

Alberto Meira e José Murado volvían competir no habitual Mitsubishi Lancer Evo X, para tratar de plantar cara aos Ford Festa R5 dos coruñeses Senra-Vázquez e Caamaño-Rodríguez. Tras un tramo especial na noite do venres, celebrado nas inmediacións do Estadio de San Lázaro, a xornada do sábado contou con outras dez especiais percorrendo as inmediacións de Compostela, con tramos clásicos en Sigüeiro, Sarandón ou Vedra.

Alberto Meira chegou á metade do rali en segunda posición, con apenas tres segundos de distancia respecto ao líder, Víctor Senra. Un novo scratch de Alberto no primeiro tramo da tarde reducía esa diferenza a menos de medio segundo, chegando entón á primeira pasada polo tramo de Touro, que resultaría decisivo. Meira explica que “fixemos un trompo, tras unha freada na que fomos demasiado optimistas. Non pasou nada grave, pero nese tramo perdemos catorce segundos que logo era xa moi difícil recuperar. Seguino tentando, pero non puido ser, e quero felicitar a Víctor pola súa boa carreira. Persoalmente estou contento, viñamos de gañar no anterior rally, e aquí demostramos outra vez que podemos ser competitivos ante coches máis modernos. As vitorias e o Campionato están ao noso alcance, se seguimos facendo as cousas ben”.

A próxima cita do galego será o Rally Ourense, no terceiro fin de semana de setembro.

CLASIFICACIÓN RALLY BOTAFUMEIRO

POS PILOTO-COPILOTO VEHÍCULO TEMPO
Senra-Vázquez Ford Fiesta R5 1:00:28.672
Meira-Murado Mitsubishi Lancer Evo X 1:00:41.529
Caamaño-Rodríguez Ford Fiesta R5 1:01:37.898
Souto-Viqueira Mitsubishi Lancer Evo X 1:04:12.125
Penido-Cancela Mitsubishi Lancer Evo VI 1:04:56.337
Bello-Bello Citroën C2 R2 1:05:03.874
Villar-López Ford Fiesta R5 1:05:25.664
Castro-Vila Mitsubishi Lancer Evo IX 1:05:29.053
Campaña-Raido BMW M3 1:05:33.022
10º Fernández-Vidal Mitsubishi Lancer Evo VIII 1:06:12.782
Anuncios