Baiona inaugurou este sábado as recentemente humanizadas rúas de Marqués de Quintanar, Cidade de Vigo e Laureano Salgado cunha xornada lúdica para todos os veciños e as veciñas, agradecendo deste xeito a súa comprensión ante as obras levadas a cabo. O programa comezou coa inauguración dos “Bancos Ilustres” en homenaxe a D. Laureano Salgado e D. Antonio Gallego de Chávez y Ramímez Arellano, VII Marqués de Quintanar.
Acto seguido tivo lugar a presentación do primeiro mural urbano do municipio, encargado á súa artista con maior proxección internacional do momento, Lula Goce. Está nunha parede de 70 metros cadrados situada na intersección das rúas Laureano Salgado e Marqués de Quintanar, xusto na nova zona de esparexemento e recreo que se creou tras as humanizacións.
Lula Goce (Baiona, 1976). Licenciada en Belas Artes pola Universidade de Salamanca na especialidade de Pintura, doutorada e máster en Belas Artes pola Universidade de Barcelona, técnica en Ilustración pola Escola de Dóaa de Barcelona e técnica en deseño gráfico polo Centro Pauta Formació de Barcelona. Esta artista, que emprega fundamentalmente a linguaxe do debuxo, foi quen de deseñar fermosas instalacións nas que o papel e a repetición teñen moita relevancia.
Actividades para os máis pequenos
Os máis pequenos e pequenas puideron gozar de forma gratuíta durante todo o día dun tobogán acuático que se instalou na rúa Laureano Salgado á altura do Liceo Marítimo. Tamén houbo inchables e obradoiros infantís nas rúas Marqués de Quintanar e Laureano Salgado.
Os comercios sumáronse á celebración
Os establecementos comerciais de Marqués de Quintanar, Cidade de Vigo e Laureano Salgado uníronse á gran inauguración das tres rúas tras finalizar con éxito as súas humanizacións. Ofreceron ao longo de todo o día distintas actividades para dinamizar a zona, descontos, agasallos de merchandising e mesmo concertos en directo.
Aparcadoiro gratuíto
Con motivo dos cortes de tráfico para poder levar a cabo as actividades púidose aparcar gratuitamente no aparcadoiro do Aral durante todo o día.
