Ana Paula Guntín toma posesión como nova Xuíz de Paz de Baiona

Ana Paula Guntín tomou este xoves posesión como nova Xuíz de Paz de Baiona nos Xulgados de Vigo. Trátase da primeira muller que ocupará o cargo, tomando a substitución de Óscar Carreño, que se xubila tras case 26 anos no posto. O seu nomeamento foi aprobado no Pleno celebrado o pasado 28 de febreiro, cos votos a favor do PP e PSOE e a abstención de BNG e EU.

“Espero que logre manterse no cargo tanto tempo ou máis que o seu antecesor Óscar Carreño, que foi un gran Xuíz de Paz en Baiona rozando as tres décadas”, sinalou o alcalde, Ángel Rodal, quen este venres acompañou a ambos no seu cambio efectivo para despedir como se merece ao saínte Óscar Carreño tras os seus 26 anos de servizo e recibir para desexarlle sorte a Ana Paula Guntín nesta nova etapa.

O Xuíz de Paz desempeña as funcións en núcleos urbanos e en zonas rurais, e exerce de mediador entre discusións familiares ou por débedas de pequena cantidade, ademais de atender o Rexistro Civil, celebrar cerimonias, inscribir nacementos, etc. Debe ser por tanto unha persoa con experiencia, con coñecemento dos veciños, con aptitude conciliadora.

Anuncios