Brais Gómez imponse no XII Premio Ciclista do San Isidro

Brais Gómez no máis alto do podio no XII Premio Ciclista do San Isidro.

Brais Gómez Cima, do Club Ciclista Ponteareas, conseguiu este sábado a vitoria no XII Premio Ciclista do San Isidro – Trofeo Suso Blanco Villar, organizado polo Club Ciclista Padronés Aluminios Cortizo co nome do que foi gran ciclista galego e actual director deportivo da entidade, desde a que promove a emerxencia de novas figuras do ciclismo.

O bandeirazo de saída deuse ás 10:00 da mañá fronte ao Concello de Rois, na Coruña, coa participación de 35 corredores Júnior e 49 da categoría Máster, que tiveron que completar un circuíto de 46 quilómetros por Antequeira, A Pontenova, Oín e Samil.

O baionés subiuse ao máis alto do podio na categoría Júnior, completando o percorrido en 1:13:54. Mario García Ontiyuelo, da Fundación Óscar Pereiro, cruzou a meta 1 minuto 47 segundos despois, e Jorge Suárez Fernández, do Cidade de Lugo, catro segundos despois do segundo clasificado, pechando o podio en terceira posición.