Usuarios do Juan María participan nas xornadas de educación viaria da Policía Local de Nigrán

Usuarios do Centro de Educación Especial Juan María recibiron este venres no Pavillón de Panxón clases prácticas de educación viaria a cargo da Policía Local de Nigrán, que empregou para a ocasión triciclos, bicicletas adaptadas da asociación Discamino, e karts eléctricos da Dirección Xeral de Tráfico (DXT).

Os centros educativos de Nigrán benefícianse ao longo deste mes de clases teóricas e prácticas completamente coordinadas, deseñadas e impartidas desde a Policía Local coa colaboración da DXT, que cede os recursos para un circuíto. Mantense así un traballo que este corpo iniciou no curso 2013/2014 impulsado polo propio inspector xefe José Manuel Vázquez.

O Grupo de Emerxencias Supramunicipal (GES) do Val Miñor colabora tamén mostrando aos nenos os diferentes vehículos de emerxencia (como o camión de bombeiros). Os axentes ensínanlles a interpretar os seus sinais, as luminosas, verticais e horizontais. Tamén lles indican como colocarse na bici, como facerse visibles ou a obrigatoriedade do casco para menores de 16 anos.

Anuncios