O Pleno do Concello de Baiona celebrado no día de hoxe aprobou por unanimidade unha moción presentada polo Grupo Municipal do Partido Popular relativa á creación dunha subvención destinada ao transporte escolar do alumnado de bacharelato do Instituto Primeiro de Marzo.
Ao longo destes meses a Concellería de Educación do Concello de Baiona levou a cabo numerosas xestións e esgotou todas as vías posibles para buscar unha solución ao problema do transporte do alumnado de bacharelato do Instituto Primeiro de Marzo. Desde o pasado mes de setembro o alumnado debía abonar 30 euros mensuais en concepto de gastos de desprazamento ao tratarse de educación non obrigatoria e ao non quedar prazas dispoñibles no transporte escolar que ofrece a Consellería de Educación á educación obrigatoria.
Así, desde o Concello de Baiona decidiuse crear unha subvención anual revisable que se implantará para o próximo curso 2018-2019 que poida axudar a sufragar o custo do devandito transporte, sen que esta decisión cause ningún prexuízo directamente ás partidas orzamentarias das que gozan os veciños e veciñas do municipio. O diñeiro non sairá do orzamento municipal senón das asignacións dos diferentes grupos políticos que forman parte da corporación do Concello de Baiona. Deste xeito presentouse e aprobouse por unanimidade unha moción pola cal se abrirá unha liña de subvencións municipal para ese efecto á cal se poderá acceder seguindo unha serie de criterios sociais. Do mesmo xeito, seguirase traballando para lograr que no novo plan de transporte da Xunta de Galicia inclúase unha parada de autobús de liña regular no centro. Desa forma, os menores de 19 anos que teñan a “Tarxeta Xente Nova” do transporte metropolitano da Xunta poderían acudir ao centro de forma totalmente gratuíta.
“A contía da subvención provirá dunha redución económica das asignacións aos grupos políticos deste municipio nun 50%, cantidade que pode ser unha gran axuda ao transporte, repercutindo así nos nosos veciños e veciñas. O diñeiro non sairá do orzamento municipal senón das asignacións dos diferentes grupos políticos que forman parte da corporación do Concello de Baiona”, destaca o Alcalde, Ángel Rodal.
Ponse solución desta forma a unha situación que vén producindo no centro desde hai tempo.
