O Maui Jim coróase novo campión de España de J80 no Trofeo Repsol

O Maui Jim Sunglasses do Real Club Marítimo de Santander é o novo campión de España da clase J80 tras vencer no nacional da clase que se disputou durante os últimos catro días na baía de Baiona. Os cántabros, con Javier Aguado á cabeza, recolleron este martes o seu cetro de gañadores de mans do Subdirector de Mariña e Pesca de Repsol, Carlos Sánchez Nieto, e de José Luis Vázquez, presidente do Monte Real Club de Yates, que este ano exercía de club organizador e anfitrión do nacional da clase.

Tras lograr o título en 2016 e quedar terceiros na edición do ano pasado, os de Santander lograron quitarse a espiniña do campionato e levaron a Cantabria o premio grande dunha competición moi rifada, na que apenas superaron por un punto aos seus compañeiros de club e un dos seus rivais máis fortes, o Mercury de Jaime Piris, que quedou segundo.

“Foi un campionato longo, con todas as condicións de vento posibles para regatear. Hai equipos que foron en mellores condicións de vento forte e outros con brisa, pero os que triunfaron son os que foron polivalentes en todas as situacións”, declarou Javier Aguado, patrón do Maui Jim, quen tamén se mostrou gratamente sorprendido pola calidade da frota local: “creceu moito e demostraron ser un referente cun nivel competitivo moi alto”.

De feito, o bronce do Campionato de España de J80 foi para un barco local, o Okofen do histórico Javier de la Gándara, o mellor de toda a frota galega que competía no Trofeo Repsol. Lucindo grímpola do Monte Real, os galegos mantivéronse nas primeiras posicións desde o comezo da competición e finalmente lograron un meritorio terceiro posto.

Na competición dos grandes barcos, da Clase Cruceiro-Regata, a vitoria foi para o Bosch Service Solutions, patroneado nas dúas primeiras probas por Santiago Estévez e co seu habitual patrón, Ramón Ojea, na regata final. Tras un duro man a man co Oral Group Galimplant de Pedro Pazos, a tripulación do Elan 37 de Canido, que se tivo que conformar coa prata na edición anterior, puido levar finalmente o ouro do Trofeo Repsol. Os de Sanxenxo quedaron co segundo posto e o Youkounkoun do Club Náutico de Portonovo, liderado por Eduardo Segade, foi terceiro.

Na Clase Cruceiro tamén se investiron os papeis con respecto á edición de 2017. O Balea Dous de Rodeira, que quedara entón segundo, fíxose este ano coa vitoria; e o vencedor da anterior edición, o Fend la Bise de Jean Claude Sarrade, do Monte Real Club de Yates, fíxose coa prata. Ambos recibiron o seu premio de mans do alcalde de Baiona, Ángel Rodal, que entregou ademais o bronce ao Albarellos de Fernando Rey, do Club Náutico de Portonovo.

Na Clase A Dous o triunfo foise para Vigo da man do Salaño Dos, patroneado por Jacobo Vecino e con Brenda Maure completando tripulación. Con dous primeiros postos e un segundo nas tres probas disputadas alzáronse vencedores e levaron a mellor puntuación para o Circuíto Rías Baixas a dous, unha nova competición de cinco probas creada este mesmo ano polo Monte Real Club de Yates, o Real Club Náutico de Portosín, o Náutico de Portonovo e o Liceo Marítimo de Bouzas. O Ay Carmela de Juan Martínez-Pazo e Rafael Martínez-Almeida, do Club Náutico de Portonovo, fíxose coa prata do trofeo e o bronce leváronllo Javier Rey e Jorge Justo a bordo do Q Talento Consultores, do Monte Real Club de Yates.

Na Clase J70, que participou no Trofeo Repsol por segundo ano consecutivo, o gañador foi o Noticia de José María “Pichu” Torcida, do Real Club Marítimo de Santander, que sentenciou a clasificación na última xornada subindo desde a cuarta á primeira posición, e deixando ao Marina Rubicón de Alfredo González de segundo e ao Marnatura de Luis Bugallo de terceiro.

Na Clase Fígaro, na que competiron en exclusiva barcos do Monte Real Club de Yates, a vitoria foi para o Serralleiras, patroneado por Elena Raga, que asinou dous primeiros postos nas tres probas disputadas. Alberto Iglesias logrou colocar ao Erizana no segundo caixón e o Tutatis de Octavio Villalba completou o podio.

Unha vez finalizado o Trofeo Repsol, o Monte Real Club de Yates prepárase xa para a súa próxima competición, a regata 525 Aniversario da Arribada da Carabela a Pinta, que se celebrará os días 12 e 13 de maio en Baiona. A cita será presentada a próxima semana e nela participarán, en exclusiva, barcos da clase 6m. Entre os participantes estará o vixente campión do mundo da clase, o rei emérito Don Juan Carlos de Borbón.

TROFEO REPSOL • 41ª REGATA DE PRIMAVERA • CLASIFICACIÓN XERAL FINAL

CAMPIÓN DE ESPAÑA DA CLASE J80

MAUI JIM SUNGLASSES • RCM SANTANDER • JAVIER AGUADO

GAÑADOR DO TROFEO REPSOL • 41ª REGATA DE PRIMAVERA MRCYB

BOSCH SERVICE SOLUTIONS • CM CANIDO • SANTIAGO ESTÉVEZ/RAMÓN OJEA

TROFEO REPSOL • CLASE CRUCEIRO REGATA

  1. BOSCH SERVICE SOLUTIONS • SANTIAGO ESTEVEZ/RAMÓN OJEA • CM CANIDO
  2. ORAL GROUP GALIMPLANT • PEDRO PAZOS • RCN SANXENXO
  3. YOUKOUNKOUN • EDUARDO SEGADE • CN PORTONOVO

TROFEO REPSOL • CLASE CRUCEIRO

  1. BALEA DOUS • LUIS PÉREZ • RCN RODEIRA
  2. FEND LA BISE • JEAN CLAUDE SARRADE • MONTE REAL CLUB DE YATES
  3. ALBARELLOS • FERNANDO REY • CN PORTONOVO

TROFEO REPSOL • CLASE A2

  1. SALAÑO DOS • JACOBO VECINO/BRENDA MAURE • RCN VIGO
  2. AY CARMELA • JUAN MARTINEZ-PAZO/RAFAEL MARTINEZ-ALMEIDA • CN PORTONOVO
  3. Q TALENTO CONSULTORES • JAVIER REY/JORGE JUSTO • MONTE REAL CLUB DE YATES

TROFEO REPSOL • CLASE J80

  1. MAUI JIM SUNGLASSES • JAVIER AGUADO • RCM SANTANDER
  2. MERCURY • JAIME PIRIS • RCM SANTANDER
  3. OKOFEN • JAVIER DE LA GÁNDARA • MONTE REAL CLUB DE YATES

TROFEO REPSOL • CLASE J70

  1. NOTICIA • JOSÉ MARÍA TORCIDA • RCM SANTANDER
  2. MARINA RUBICÓN • ALFREDO GONZÁLEZ • CD TÉCNICA Y REGATAS
  3. MARNATURA • LUIS BUGALLO • RCN VIGO

TROFEO REPSOL • CLASE FÍGARO

  1. SERRALLEIRAS • ELENA RAGA • MONTE REAL CLUB DE YATES
  2. ERIZANA • ALBERTO IGLESIAS • MONTE REAL CLUB DE YATES
  3. TUTATIS • OCTAVIO VILLALBA • MONTE REAL CLUB DE YATES

 

Anuncios