O Miudo do club We Do Sailing, patroneado polo portugués Afonso Leite, anotouse este sábado en Baiona o primeiro podio do Trofeo Infinitus tras vencer na xornada de apertura do campionato organizado polo Monte Real Club de Yates.
A Liga de Inverno do club baionés fixo honra ao seu nome e presentouse ante a frota de J80 cunha xornada tipicamente invernal, de ceo plomizo, frío e choiva. A pesar das condicións pouco favorables, os regatistas saíron con ganas de estrearse na primeira regata do ano, e o comité forzou, con bastante dificultade, a celebración de dúas mangas, nas que predominou un vento moi rolón e de pouca intensidade.
Cos dous percorridos acurtados no segundo paso pola boia de barlovento, a frota logrou resultados moi dispares. A primeira manga levoulla o Cansino de Fernando Yáñez, patroneado hoxe polo que fose bicampión galego de vaurien, Castor Alonso. No segundo bastón a tripulación perdeu algo de fol e acabou cuarta, caendo finalmente ata a segunda posición da xeral.
A vitoria da segunda manga asinouna o portugués Miudo, cun triunfo que, sumado ao cuarto posto logrado na primeira manga, outorgoulles o ouro provisional do campionato. O bronce foi para o J80 La Galera, patroneado por Rosario García, do Real Club Náutico da Coruña.
O Virazón de Miguel Lago, que regresou ás competicións de J80 de Baiona tras varios meses regateando na clase 6 m, vai en cuarto posto e moi preto del, a apenas un punto de distancia, sitúase o Luna Nueva de Juan Luis Tuero.
Completan a clasificación da Liga de Inverno do Monte Real o Meltemi de Guillermo Blanco, o Pazo de Cea de María Campos, o Namasté de Luis de Mira e o Marina Real de Joaquin Cobelo. O Okofen de Javier de la Gándara, que acabara as probas en segunda posición, caeu ata o décimo posto tras a resolución dunha protesta na súa contra.
Por baixo del, o Cormorán II de Yago González- Robatto, o SND Cormorán de Francisco J. Martínez, o Mondo de Bernardo Macedo, o Ferralemes de Enrique Porto e o Marías de Manuel Maria Cunha.
O Trofeo Infinitus Rent regresa a Baiona a finais de mes, coa segunda xornada de probas o sábado 25 de xaneiro.
CLASIFICACIÓN XERAL (Top5) TROFEO INFINITUS RENT
1. MIUDO • Afonso Leite • We Do Sailing
2. CANSINO • Fernándo Yáñez • Monte Real Club de Yates
3. LA GALERA • Rosario García • Real Club Náutico A Coruña
4. VIRAZÓN • Miguel Lago • Monte Real Club de Yates
5. LUNA NUEVA • Juan Luis Tuero • Monte Real Club de Yates
