Anuncios
Ticker de novas

Novas inundacións na rúa Ponte Nova de Sabarís

FOTO: CASTRO E LADEIRA // Inundacións na rúa Ponte Nova de Sabarís.

Na mañá deste domingo producíronse novas inundacións na rúa Ponte Nova de Sabarís (Camiño Real) por mor das intensas choivas. Como xa denunciou o pasado 20 de decembro a Asociación de Veciños Castro e Ladeira, a auga acaba alagando a estrada e entrando nas vivendas.

“Como se pode observar non está arranxado como dicía fai once días o concelleiro de Urbanismo, Jose Ángel Bahamonde, nas súas declaracións de que se actuou, segue o mesmo problema”, sinalan desde o colectivo veciñal.

Para Castro e Ladeira o problema é que as cunetas que recollen a auga de moitos barrios non dan abasto, coa consecuencia do desbordamento e entrando nas vivendas. “A solución sería actuando cunha obra menor por parte do Concello e seguen pasando de todo, por iso tivemos que chegar á vía xudicial. Esperamos que o arranxen con carácter urxente”.

“A indignación por parte dos veciños aumenta e cando veñen as choivas o medo máis, xa que no século que estamos non se poida estar tranquilo nin na túa propia vivenda”, conclúen desde a Asociación. Os veciños piden unha solución urxente ao problema.

Anuncios