Anuncios
Ticker de novas

O Parador de Baiona acolle a primeira edición dos Diálogos España-Portugal

O Foro Económico de Galicia, en colaboración con EY (Building a better working world) e o Consorcio Zona Franca de Vigo, organiza a primeira edición dos Diálogos España-Portugal este xoves 16 de novembro no Parador de Baiona.

O evento nace con vocación de converterse nun punto de encontro de empresarios, académicos, xornalistas económicos e representantes políticos e sociais de España e Portugal. Un foro non oficial no que se poidan intercambiar opinións e argumentos sobre retos e desafíos económicos similares ou mesmo conxuntos; e no que se poidan compartir experiencias exitosas e converxer en propostas de actuación conxunta a escala peninsular, pero tamén comunitaria. Galicia, pola súa particular vinculación con Portugal no mapa español, ofrece o mellor dos escenarios para desenvolver ese traballo de diálogo transfronteirizo e o Foro Económico de Galicia asume o reto de lideralo.

A I Edición dos Diálogos España-Portugal arrancará coa inauguración do mesmo a cargo de Salustiano Mato (Reitor da Universidade de Vigo), Teresa Pedrosa (Delegada do Consorcio Zona Franca de Vigo) e Emilio Pérez Nieto (Presidente do Foro Económico de Galicia). Tras iso, o Ministro portugués de Economía, Manuel Caldeira Cabral, impartirá unha conferencia presentado polo Profesor da Universidade do Minho, Francisco Carballo. A continuación, desenvólvese un panel sobre competitividade empresarial e mercado ibérico, moderado polo Director do Foro Económico de Galicia e Catedrático da Universidade de Vigo, Santiago Lago Peñas, e no que participarán João Miranda (CEO do Grupo portugués Frulact), Pedro Ferraz da Costa (Presidente do Fórum para a Competitividade de Portugal), José Miguel Isidro (Presidente do Grupo español Europac) e Juan Costa (Socio de EY Global).

Tras o xantar, Marta Fernández Currás (Socia Directora EY Galicia) moderará a mesa sobre estabilidade fiscal e desafíos orzamentarios, na que participan Pablo Hernández de Cos (Director Xeral de Economía e Estatística do Banco de España), Jorge Martínez-Vázquez (Catedrático da Georgia State University), Ricardo Arroja (Economista portugués) e Antón Costas (Catedrático da Universitat de Barcelona).

A continuación, intervirá a Secretaria de Estado de Economía do Ministerio español Irene Garrido. Para a clausura contarán co Conselleiro de Facenda da Xunta de Galicia, Valeriano Martínez.

PROGRAMA I DIÁLOGOS ESPAÑA-PORTUGAL

Anuncios