A Deputación achega máis de 81.000 € a Gondomar ao abeiro do “Plan Concellos 2017”

A Deputación de Pontevedra vén de aprobar por Resolución Presidencial novas achegas ao concello de Gondomar, no marco do “Plan Concellos 2017”, dentro da súa liña 1 de investimentos. Nesta ocasión, a institución provincial, presidida por Carmela Silva, achegará 81.414,77 € para actuacións de eficiencia enerxética e xestión intelixente en bombeos de augas residuais do concello e para a compra dunha mini escavadora.

Ao abeiro do “Plan Concellos 2017”, anteriormente a institución provincial xa destinara a Gondomar outros 360.680,58 € na liña 1 para a merca dunha desbrozadora de brazo lateral e un vehículo para a concellería de vías e Obras e o departamento de Benestar Social, para a construción da pasarela peonil na contorna do mercado de abastos, actuacións de seguridade viaria e reparación de camiños así como actuacións nas vías de Igrexa e San Martiño en Borreiros. Á marxe da liña 1, a Deputación de Pontevedra tamén aprobou destinar a Gondomar outros 73.409,57 €, na liña 2, para actuacións como a aula de teatro, Gondoverán, carreiras, obradoiros, a II Gala do Deporte, o vídeo promocional turístico do concello, o 400 aniversario do Conde de Gondomar, o programa de cinema, festas e cursos formativos. Amais, a institución provincial tamén aprobou achegar 211.000,67 euros para a contratación de 21 persoas para garantir a correcta prestación dos servizos municipais no concello.

Coa suma desta nova achega, Gondomar xa ten recibido da Deputación de Pontevedra o 77,23% do total do investimento que lle corresponde dentro do “Plan Concellos 2017”, isto é, 726.505,59 € dun total de 940.746,04 €.

Anuncios