A comunidade terapéutica Alborada promoveu este Xoves Santo, en colaboración co Concello de Baiona, unha nova iniciativa ambiental na praia da Ladeira. O proxecto, coordinado por unha educadora do centro responsable da área de lecer e tempo libre, consiste en limpar zonas de interese natural como ríos ou praias.
Un educador do centro acompañou a aqueles pacientes que están a tratamento en días festivos ou fins de semana e entre todo o grupo levaron a cabo a limpeza do areal da Ladeira.
A actividade desenvolveuse o xoves e dende o Concello de Baiona se colaborou coa iniciativa e proporcionou todo o material necesario para a actividade, dende luvas a bolsas resistentes para poder recoller este tipo de residuos. Algúns veciños e bañistas da zona uníronse axudando na actividade.
O obxectivo é que os usuarios do Centro Alborada a través desta iniciativa tomen conciencia da importancia do respecto ao medio ambiente así como aprender a xestionar o seu tempo de lecer con actividades saudables.
