O Alcalde de Gondomar, Paco Ferreira, clausurou as II Xornadas de Educación Viaria impartidas nos colexios de Gondomar este semestre, acompañado pola Concelleira de Educación e Infraestruturas, Iria Lamas, e a Concelleira de Xuventude e Cultura, Nuria Lameiro.
Os alumnos e alumnas dos colexios CEIP Souto Donas, CEIP Chano Piñeiro, CEIP Serra Vincios e CEIP Neira Vilas Peitieiros dos cursos de 3º, 4º, 5º e 6º de primaria foron os destinatarios desta formación, impartida por dous policías locais de Gondomar co apoio da DXT.
As xornadas dividíronse en clases teóricas, onde os nenos e nenas aprenderon o comportamento correcto dun peón así como as normas á hora de circular en bicicleta por estrada, e as xornadas prácticas, nun circuíto pechado nos propios centros de educación, no caso dos alumnos de 3º e 4º de primaria facendo os percorridos e respectando os sinais en bicicleta e no caso dos alumnos de 5º e 6º de primaria en karts.
