As infantís do CB Airexa de Nigrán proclámanse campioas de liga

FOTO: CB AIREXA

As xogadoras infantís do Club de Baloncesto Airexa de Nigrán proclamáronse campioas de liga este sábado pola mañá tras a vitoria conseguida no campo do Apóstol.

As xogadoras dirixidas por Manu Martín e Alba Giráldez están a realizar unha segunda fase perfecta e mantéñense invictas a falta de dúas xornadas. Con este triunfo conseguiron alzarse matematicamente co título de liga e con iso obteñen a única praza que había en xogo na nosa delegación para disputar a fase de ascenso a 1ª división de Galicia.

O duro traballo de todo un ano sumado á boa liña continuista que implantou o club desde hai dúas tempadas mostra cada vez máis froitos. En tempadas precedentes o club xa viu como se fixo con varios campionatos en categorías superiores e agora empeza a destacar tamén en categorías base como son as infantís, e mirando debaixo delas temos ás alevíns tamén cun papel excelente, onde manteñen intactas as súas opcións de meterse na final da liga a falta de dúas xornadas para o campionato.

A aposta feita anos atrás pola formación da canteira buscando os mellores adestradores/as da contorna demostra que o esforzo mereceu a pena e que esta liña debe de continuar para seguir crecendo.

Desde o club queren felicitar publicamente a todas as xogadoras e ambos os dous adestradores sen esquecerse de facer unha mención especial a todos os pais e nais das mesmas que co seu esforzo diario e apoio en cada partido fixeron posible que o equipo creza ata onde hoxe témolo.