Anuncios
Ticker de novas

A Real Academia Galega escolle Nigrán para inaugurar o Ano de Carlos Casares

FOTO: ALBERTO RODRÍGUEZ

A Real Academia Galega presentou esta mañá o seu proxecto web Primavera das Letras da man da comunidade educativa na biblioteca do CEIP Carlos Casares de Vilariño (Nigrán), o lugar onde estableceu o seu fogar en 1983 e onde escribiu unha parte importante da súa obra o protagonista do Día das Letras Galegas 2017. A través de academia.gal/primaveradasletras, o profesorado de infantil e primaria, os pais e nais e o propio alumnado poderá acceder a propostas didácticas e lúdicas, parte delas interactivas, para se mergullar no universo literario e vital do escritor. As actividades deseñáronse cun enfoque interdisciplinario e están relacionadas con distintos contidos do currículo escolar, de tal xeito que permiten traballar na aula, ou na casa, non só aspectos lingüísticos e literarios, senón tamén contidos e competencias de coñecemento do medio natural e social, historia ou educación artística. Como novidade, nesta segunda edición haberá un concurso no que os centros educativos poderán contarlle á Academia como celebran o Día das Letras Galegas.

Tras a boa acollida da primeira edición deste proxecto, dedicada a Manuel María, a RAG decidiu adiantar a chegada da Primavera das Letras, de acordo con outro dos seus obxectivos: promover que a aprendizaxe arredor do Día das Letras Galegas non se limite aos días previos ao 17 de maio. Os materiais iranse publicando desde hoxe mesmo ata as vésperas desta data. Entre as propostas xa dispoñibles, figuran unha actividade interactiva centrada en Nigrán e fichas para coñecer o Entroido do Ourense natal do autor e poñerlle cores.

O centro escollido para a presentación leva o nome de Carlos Casares desde pouco tempo despois do seu pasamento. Con este xesto rendeulle así homenaxe “ao veciño que traía os seus fillos a este colexio” e que “soubo amar a súa lingua e mirar para fóra, para compartir e aprender”, expresou a directora, Ana Domínguez. A mestra foi a encargada de conducir o acto, no que un grupo de estudantes de 5º e 6º interpretaron un anaco d’A galiña azul, a primeira obra do autor destinada ao público infantil (1968), que marcou un fito na literatura en galego para os máis pequenos. O público tamén puido escoitar un anaco d’O principiño en versión orixinal francesa e a súa tradución ao galego, obra de Casares, nas voces dunha nai e unha alumna.

O presidente da Academia, Xesús Alonso Montero, salientou o empeño que o equipo docente pon en que o alumnado se achegue á literatura a través da escrita de Carlos Casares, que é, dixo, “unha maneira de que queden comprometidos para sempre coa literatura galega”. Non en van, “foi capaz de entender os nenos e, polo tanto, escribir sobre e para os nenos”, destacou. Casares é ademais autor de varias das “obras máis sólidas da narrativa galega”, asegurou en referencia a Deus sentado nun sillón azul ou O sol do verán.

Carlos Casares escribiu estes dous libros no seu fogar de Vilariño, “o lugar onde viviu máis tempo e tamén onde máis tempo pasou escribindo”, recordou pola súa banda Hakan Casares, fillo do autor, membro da Fundación Carlos Casares e exalumno do colexio, quen lle agradeceu tamén á RAG que escollese esta localidade para celebrar o primeiro dos seus actos dentro da programación prevista arredor do Día das Letras Galegas 2017 pola importancia que tivo na súa vida e obra. Na súa casa de Nigrán escribiu tamén miles das súas columnas para a prensa, que adoitaba redactar polas tardes, ou a colección infantil d’O Toribio.

O secretario da Academia, Henrique Monteagudo, foi o encargado de presentar a nova edición de Primavera das Letras que, como o ano pasado, volve estar dedicado a un autor “que se presta moito para traballar co alumnado de infantil e primaria”. No acto tamén tomaron a palabra o alcalde de Nigrán, Juan González, e a responsable do Equipo de Dinamización Lingüística do colexio, Vanesa Vargas. Como convidado especial acudiu tamén o director do Instituto de Estudos Miñoráns, Xulián Maure, acompañado doutros membros desta asociación referente da cultura da comarca do Val Miñor.

Anuncios