Anuncios
Ticker de novas

Martín Otero: “Seguiremos dando guerra para converter o antigo Mercado en Centro Social”

Martín Otero tentará revalidar o seu cargo na Asociación de Veciños Castro e Ladeira de Sabarís para continuar presidindo a entidade catro anos máis. Polo momento non existe ningún outro candidato ás eleccións que se celebrarán o vindeiro domingo 12 de febreiro.

A Asociación de Veciños Castro e Ladeira renaceu en 2013 para defender os intereses sociais, veciñais e culturais. Martín Otero, de 37 anos e nado en Sabarís, é o presidente máis novo, xa que habitualmente adoita ser xente xubilada, e dedica parte do seu tempo, renunciando ás veces ao lecer e á familia. “É gratificante e síntome fenomenal por poder axudar aos demais e facer o ben na parroquia”, asegura.

“Estes catro anos presidindo Castro e Ladeira ensináronme que é imprescindible e necesario que siga funcionando esta asociación”, indica Martín, que engade que se sente orgulloso de representar “a parroquia máis importante do Concello, con tantos habitantes e moito comercio e a mellor praia”.

“Sen carecer de subvencións, simplemente das cotas dos socios, e sen centro social, que foi a miña motivación para reactivala naquel momento, percorrendo casa a casa para volver facer socios, foi difícil comezar de cero e sen experiencia, pero estamos aquí para contalo”.

Agradece aos colaboradores e os compañeiros de directiva por confiar nel e convida a seguir colaborando. Así mesmo, fai un chamamento aos máis novos para formar unha área xuvenil.

Coa experiencia para o próximo mandato, se é reelixido, adianta que “seguiremos dando guerra”, con proxectos pendentes como converter o antigo Mercado de Abastos de Sabarís en Centro Social, para o que xa solicitaron axuda a todas as administracións, presentando ademais un anteproxecto elaborado por dous arquitectos.

“Gustaríame que o fixesen na maior brevidade posible, xa que estes últimos catro anos non incluíron nos orzamentos municipais nin unha partida para o proxecto, pola contra xa estaría a día de hoxe feito na súa totalidade ou en parte”, incide. A parroquia de Santa Cristina da Ramallosa é a única da comarca que non dispón dun Centro Social e Cultural.

Para os próximos catro anos, tamén lle gustaría que se continuase co saneamento que falta, e outro reto, conseguir que a Casa Rosa ou Centro Antena permaneza aberto e póñase en valor, xa que é o único do municipio, “e pódese explotar en todos os sentidos, o exemplo para seguir é o de Nigrán, ao que acode xente de Baiona”.

A nivel cultural, a Asociación realiza multitude de actuacións e eventos, destacando as festas gastronómicas e as excursións, moi demandadas polos veciños. “Seguiremos na mesma liña”, afirma.

“A nivel social seguiremos colaborando co Banco de Alimentos e coas actividades para discapacitados, como a ruta de quads que facemos desde fai tres anos. Tamén temos dous proxectos pendentes que cando estean concretados desvelaremos”, conclúe.

Anuncios

Deja un comentario

Tu dirección de correo electrónico no será publicada.