Os nenos teñen unha concentración máis baixa de melanina protectora, a súa pel é máis delgada, e as capas de pel máis ricas en células nai son máis susceptibles a mutacións, por non dicir que a pel máis delgada incrementa a probabilidade de queimaduras solares. Así o puxeron de manifesto na tarde deste xoves as pediatras do Hospital Vithas Vigo Cristina Granja e Patricia Oliván no desenvolvemento dunha Aula Saúde dedicada á fotoprotección infantil.
Durante a charla, que se desenvolveu coa colaboración de Rilastil, as pediatras do Hospital Vithas Vigo puxeron de manifesto que o sol “é necesario para a vida”. De feito, aseguraron que, no verán, con ter un 25 por cento de toda a pel exposta ao sol un máximo de dez minutos é suficiente para a produción correcta de vitamina D. Con todo, “unha exposición excesiva pode conlevar efectos nocivos para a saúde” e no caso dos nenos “pode estimular unha melanoxénese do bronceado ou levar a unha información xenética alterada e a un comportamento celular anómalo”.
Con este contexto, a promoción da fotoprotección foi a base do obradoiro, partindo da necesidade de modificar algunhas rutinas que se están convertendo en habituais. Así, as Dras. Granja e Oliván advertiron que “o uso de fotoprotección minimiza o dano das radiacións, pero non debe de considerarse como un medio para aumentar o tempo de exposición solar”.
Tamén avogaron polo uso de roupa e complementos axeitados como roupa de cores escuras e teas grosas, preferentemente de elastano e lycra (as que maior protección solar teñen); o uso de roupa fotoprotectora, que ofrece como gran vantaxe a súa lixeireza con altas cotas de protección. Do mesmo xeito, apostaron polo uso de chapeus de á ancha, ou de lentes de sol, tendo en conta que non sempre as máis escuras son as máis protectoras. Estas deben de ser, sempre, homologadas e co selo de calidade CE.
Sobre o uso de fotoprotectores orais en nenos, as pediatras do Hospital Vithas Vigo indicaron que, deben de ser complementarias ao resto de medidas; e que necesitan máis estudos científicos para considerarse demostrada a súa eficacia.
Tipos de cremas
Entrando xa no uso de cremas solares, explicaron que hai filtros físicos (minerais) e químicos; e tentaron aclarar as dúbidas sobre a nomenclatura que utilizan estes produtos. Así, indicaron que os produtos resistentes á auga (water resistant) teñen unha durabilidade de 40 minutos; que se duplica no caso dos produtos waterproof, ou moi resistentes á auga.
Por outra banda, explicaron que o SPF é o número de veces que aumenta a capacidade de defensa da pel fronte ao eritema e só fai referencia á radiación ultravioleta B (UVB). De feito, a protección UVA (ultravioleta A) é maior ou igual a un terzo da ultravioleta beta. A indicación IR-A fai referencia á protección contra as radiacións infravermellas e o termo “hipoalerxénico” ou “non comedoxénico” minimiza as reaccións alérxicas.
Neste sentido, as Dras. Granja e Oliván lembraron que non necesariamente protexe máis unha crema solar con SPF 90 ou 100 que un de 50, xa que aínda que é certo que a capacidade de radiación eritematosa aumenta moito en SPF baixos e vai aumentando, chega un determinado nivel onde se estanca. Así, unha crema con factor de protección solar (FPS) 20 bloquea o 95 por cento da radiación; un FPS de 50 bloquea o 98 por cento; e un FPS 100 bloquea un 99 por cento; por iso, desde 2006, a Unión Europea recomenda clasificar os niveis en baixa: de 1 a 10; media (entre 15 e 25) alta (entre 30 e 50) e moi alta (máis de 50).
As pediatras do Hospital Vithas Vigo fixeron fincapé na importancia de reforzar a crema en zonas facilmente esquecidas como son as orellas, beizos, caluga, mans, pálpebras, empeine… Tamén lembraron que os filtros físicos protexen de maneira inmediata do sol; mentres que os químicos tardan uns 30 minutos en ser efectivos.
Recomendaron usar dúas liñas estendidas en dous dedos para protexer a pel do rostro dos nenos, outros dous para cada perna e para cada brazo, dous para o peito e dous para a barriga; mentres que para a protección das costas débense de utilizar catro dedos; ou o que é o mesmo, uns 30 ml para toda a pel exposta ao sol.
Tamén aludiron aos diferentes tipos de texturas que hai, especialmente nos produtos pediátricos, facendo un repaso por distintos produtos existentes no mercado, as súas vantaxes e a súa indicación máis indicada en función da seguridade dermatolóxica, o nivel de fotoprotección, ou a súa resistencia á auga e condición hipoalerxénica.
Este obradoiro de fotoprotección forma parte da iniciativa de Vithas Aula Saúde de formar e informar á sociedade sobre aspectos relacionados co coidado da saúde como parte do compromiso de Vithas coa sustentabilidade empresarial.
