A Peña Celtista Arribada Celeste presentou este mércores oficialmente a 6ª edición do seu clásico torneo de fútbol 7 entre peñas do Celta, que se celebrará o vindeiro sábado 1 de xuño no Campo do Aral, en Baiona, coa participación das peñas Arribada Celeste, Irmandiños, Casco Vello, Exiles 1873 e Centolos Celestes.
O acto contou coa presenza de Ramón Soto Ignacio, presidente de Arribada Celeste; Antón Álvarez, membro do consello de administración do R.C. Celta; Jesús Vázquez Almuiña, alcalde de Baiona; Ana Iglesias, concelleira de Deportes; Joaquín López, concelleiro de Actividades Marítimas, e José Antonio Pena Rúa, directivo do Erizana C.F. Tanto o Concello de Baiona como o Erizana C.F. acudiron á presentación como entidades colaboradoras do torneo.
Durante a presentación, Ramón Soto Ignacio destacou a importancia de retomar este evento tras anos de inactividade e por coincidir co centenario do R.C. Celta. “É un torneo que gustaba moito entre as peñas e que co cambio de directiva deste ano quixemos recuperar. Trátase dunha festa máis do celtismo, que cobra especial importancia para nós por ser o ano do centenario do Celta, e que ademais aproveitamos como primeiro festexo do noso 12º aniversario”, afirmou.
Esta nova edición do torneo reaparece para consolidarse como un dos eventos fixos do calendario de verán para peñistas do R.C. Celta, servindo ademais como primeiro evento de celebración do 12º aniversario da peña celtista de Baiona. Arribada Celeste convida a todos os afeccionados e veciños de Baiona a asistir e gozar dunha xornada deportiva e festiva no Campo do Aral, na que non faltará música, comida, fútbol e, sobre todo, moito celtismo.
Programación e horarios torneo:
- 10:00-10:30 Recibimento aos equipos
- 10:30 Pasarrúas do grupo “Os de Sempre”
- 10:30-13:30 Fase de grupos
- 16:15 Fase final equipos clasificados
- 17:15 Final torneo
- 18:00 Entrega de trofeos
