A Concellería de Cultura do Concello de Baiona organiza xunto cos coleccionistas particulares Antonio Pino Magallanes, Manuel Pazó e Luis Molist unha mostra de máis dun centenar de bicicletas clásicas e antigas de diferentes épocas e oficios co obxectivo de render unha merecida homenaxe ás figuras de Alfonso González Besada do establecemento “Ciclos Palacios” da Ramallosa e a Fernando González Durán de “Bicicletas Fernando” de Baiona, por máis de medio século dedicados ao taller de aluguer e reparación de motos e bicicletas no Val Miñor.
Esta mostra realiza un percorrido polas diferentes bicicletas antigas e clásicas que se empregaban nos oficios de antano como por exemplo as utilizadas no reparto de pan, de prensa, de correos, os repartidores de leite ou a Garda Civil, entre outras. Así mesmo, contará cun apartado de bicicletas relacionadas co eido do cine, con réplicas presentes en películas como “Sempre Xonxa”, “La Vida es Bella” ou “ET, el Extraterrestre”.
A exposición poderá visitarse do 24 de maio ao 12 de xuño en horario de 11:00 a 13:00 e de 17:00 a 20:30 horas os luns, sábados e domingos e de 17:00 a 20:30 horas de martes a venres, sendo a entrada libre.
