Tras unha primeira xornada en exclusiva para os J80, as Rías Baixas acolleron este sábado á frota ao completo do Trofeo Repsol que o Monte Real Club de Yates pon en xogo estes días co patrocinio da compañía enerxética. Medio centenar de veleiros partiron dos pantaláns do club baionés para disputarse un percorrido costeiro cara a Sanxenxo que se ía a desenvolver, nun principio, sen complicacións. As previsións meteorolóxicas apuntaban a esta segunda xornada como un bo día de navegación, con moi bo vento, pero todo torceuse cando o Comité de Regata saíu á baía de Baiona a colocar a liña de saída e Eolo empezou a facer das súas. O vento caeu e os plans de dar saída á regata desde o interior da baía fóronse ao traste.
Tocou esperar, pero ao ver que a situación non melloraba, a organización tomou a decisión de mandar aos veleiros fóra da baía para tratar de atopar vento fronte ás illas Cíes, nunha zona na que habitualmente adoitan disputarse moitas regatas polas súas boas condicións. O caso é que tampouco había alí vento suficiente, polo que ás tripulacións tocoulles flotar e esperar a que as condicións fosen propicias, algo que non se produciu ata tres horas despois da hora na que estaba previsto dar a saída inicialmente. Finalmente o vento fixo acto de presenza e o Comité de Regata puido colocar as boias de saída e unha boia de desmarque, de obrigado paso para os veleiros, que fixo que os barcos fosen tomando posicións antes de soltar spi e emprender rumbo directo a Sanxenxo.
O tedio desas primeiras horas de encalmada transformouse por completo e deixou un día moi agradable para a navegación, con nubes e claros, unha temperatura non moi fría e unha media de 8-10 nós de vento, que facilitou a navegación da frota.
ORC 1-3
De toda a frota, o Aceites Abril, de Luis e Jorge Pérez Canal (RCN Vigo), foi o máis rápido en completar o percorrido de 13,74 millas ata o porto de Sanxenxo. Investiu unha hora e corenta e catro minutos na navegación e colocouse á fronte da clase ORC 1-3. “Estamos moi contentos de como nos saíu a regata”, dixo Jorge Pérez Canal ao finalizar a proba. “Fixemos unha moi boa saída e desde a boia de desmarque saímos directos con bo vento e a moi bo ritmo”. No segundo e terceiro posto desta categoría un barco de Punta Lagoa, o Bon III de Víctor Carrión; e outro de Vilagarcía, o Narval de José Antonio Portas.
ORC 4
En ORC 4, o Deep Blue 2.1 de Vicente Cid (RCN Vigo), que chegou á Repsol con boa enerxía tras proclamarse vencedor, hai apenas unha semana do Trofeo CdeC, fíxose co triunfo provisional da clase. Superou ao John’n Jack de Jean Claude Sarrade, do Monte Real; e a La Burla Negra de Castrelo de Miño, que van segundo e terceiro respectivamente.
ORC 5
En ORC 5, a tripulación do Balea Dous (RCN Rodeira), liderada por Luis Pérez, deixou claro nesta proba que é unha das favoritas para levar a vitoria final. Cunha boa navegación logrou coarse na primeira posición, superando ao Nahela de Víctor Álvarez (CD Alagua), que ostenta a prata provisional; e ao Ronáutica Marinas de Joaquín Carneiro (CN San Telmo), que pecha o triángulo dos tres mellores.
A2
En A2, a parella formada por Jacobo Vecino e Brenda Maure (RCN Vigo) volven demostrar, en cada proba que se celebra, que é moi difícil superalos. O tándem Vecino-Maure funciona á perfección nas costeiras e nesta primeira etapa rumbo a Sanxenxo non defraudaron. Van primeiros, seguidos dos seus compañeiros de club José Luis Ríos e María Jesús Montes, a bordo do Bonaventure; e de Juan Carlos Trabazos e Joaquín Dasilva (MRCYB) no Asante Sana.
ORC EXTRA
Na clase ORC Extra, onde compiten practicamente en exclusiva as tripulacións da Escola de Vela do Monte Real Club de Yates, a bordo dos Fígaros do club, e con equipos formados por alumnos, o Serralleira de Juan Manuel Terrones colocouse na cabeza. Vai segundo o Bouvento de Javier Bernárdez e terceiro o Silleiro de José Miguel Rocha.
J80
Na competición dos J80, que levan dúas probas máis que o resto tras disputarse varios bastóns este venres na baía de Baiona, o Alboroto ten o ouro provisional tras lograr ascender unha posición. O Waikiki, que viña primeiro da xornada inaugural caeu do podio provisional, que lideraba, e os de Javi Aguado colocáronse primeiros con 7 puntos. O Grupo Puma de Javier Martínez Valente vai segundo con 9 puntos e en terceira posición cóase no podio provisional o Namasté de Luis de Mira, con 18 puntos.
DE SANXENXO A BAIONA A POLOS TROFEOS
O Trofeo Repsol – 46ª Regata de Primavera finaliza este domingo coa costeira de regreso entre Sanxenxo e Baiona, que marcará as últimas puntuacións da clasificación e revelará o cadro de gañadores final. A entrega de premios celebrarase a partir das sete da tarde no Monte Real Club de Yates, organizador da competición.
