A compañía galega de distribución alimentaria Vegalsa-Eroski sumarase este sábado á iniciativa promovida pola organización independente WWF, a Hora do Planeta, apagando os rótulos exteriores de 248 dos seus establecementos en Galicia, Asturias e Castela e León como mostra do seu compromiso coa sustentabilidade ambiental.
Por décimo ano consecutivo, a empresa mostra o seu apoio a esta causa que se articula como o maior movemento global en favor da natureza, símbolo da loita contra o cambio climático e a perda de biodiversidade. Concretamente, os establecementos das súas insignias hipermercados Eroski, supermercados Eroski Center, Eroski City, Autoservizos Familia e Cash Record deixarán de estar iluminados este sábado durante unha hora, entre as 20:30 e as 21:30 horas, no marco desta iniciativa mundial. Ademais, incluirase cartelería informativa en tenda sobre esta acción e a compañía farase eco nas súas redes sociais. “Dar unha hora ao planeta é facer que o tempo conte e que o faga da mellor forma posible: coidando da nosa contorna. Desde Vegalsa-Eroski levamos dez anos sumándonos a esta iniciativa, aliñada co noso compromiso coas comunidades nas que temos presenza, o consumo responsable e coa alimentación sostible”, sinala a directora de Sustentabilidade e Comunicación Corporativa de Vegalsa-Eroski, Gabriela González.
Catalizadores do cambio
Conscientes de que reducir o impacto ambiental é a mellor forma de loitar contra o cambio climático, desde Vegalsa-Eroski implementáronse distintas medidas de sustentabilidade que contribúan a reducilo no exercicio da súa actividade. A nivel de establecementos, a compañía conta con medidas de eficiencia enerxética tanto en iluminación, coa instalación de luces led, como en climatización, a través da automatización e monitorización das instalacións de tenda para unha xestión máis eficiente da enerxía eléctrica que lle permitiu reducir o 35% do consumo enerxético.
Para reducir o uso de bolsas de plástico convencionais nos seus establecementos, a empresa incluíu desde comezos de 2019 solucións sostibles como as bolsas de papel con selo FSC mixto, bolsas compostables ou mallas reutilizables para a compra de froita e verdura a granel. E para reducir o consumo de papel, estendeu á súa rede comercial a opción do billete dixital a través da súa aplicación móbil Eroski, ofrecendo así a posibilidade aos clientes de consultar e descargar o recibo da compra realizada como alternativa ao tradicional de papel.
Ademais, a compañía conta cun programa integral para combater o desperdicio de alimentos en toda a cadea de valor e que recentemente foi certificado da man de Bureau Veritas, convertendo así a Vegalsa-Eroski na primeira empresa do sector da distribución alimentaria en Galicia en conseguir esta certificación. Este selo súmase á certificación obtida do seu sistema de economía circular de plásticos no ano 2022 e que avala o proceso mediante o cal a compañía dá unha segunda vida ao residuo plástico a través da fabricación das bolsas de compra corporativas que a compañía pon ao dispor dos seus clientes ao seu paso por caixa.
A empresa apoia tamén iniciativas que contribúan a concienciar sobre os efectos do cambio climático como a plantación de árbores que cada ano realiza nunha contorna escolar da comunidade galega, a protección da contorna natural a través da súa participación en iniciativas como a Gran Limpeza de Fondos Mariños, que leva a cabo no marco do Festival Mar de Mares, na Coruña, ou a limpeza integral de praias galegas a través da súa colaboración no programa RE-MAR da Asociación AMICOS. Sen esquecer o labor de difusión do patrimonio natural que leva a cabo, tanto a través da colaboración recentemente formalizada con Montes de Vigo, como a través do Programa Camiño a Camiño do Concello de Vigo.
