O 23 de xaneiro de 2024 púxose en marcha o servizo de préstamo de biotrituradoras do Concello de Gondomar. Desde entón o número total de solicitudes recibidas, a través do rexistro, foi de 33; 14 solicitudes para as biotrituradoras de gasolina e 19 para as biotrituradoras eléctricas.
Até o de agora, o servizo funciona perfectamente, non houbo incidencias e os usuarios utilizan as máquinas dun xeito axeitado, grazas á formación que reciben antes do seu uso, así como as instrucións e videotutoriais que están dispoñibles na web municipal.
Actualmente, aquelas persoas que solicitan a máquina eléctrica poden contar con ela nun período máximo de tres días desde o día da solicitude. Aqueles que solicitan as de gasolina teñen un tempo de espera de ao redor de 10 días debido, principalmente, a que o número de máquinas é a metade.
Polo xeral, os usuarios de ambas as dúas máquinas móstranse moi contentos co servizo de préstamo, pola rapidez na entrega, coa calidade das máquinas e co resultado final do material. O horario de entrega e de devolución das máquinas adáptase en parte ás necesidades das persoas solicitantes.
