Correos volve poñer en marcha a partir de mañá no Camiño Portugués desde A Guarda o seu servizo Paq Mochila, para o transporte de mochilas e maletas dun aloxamento a outro. O servizo, que permite aos peregrinos camiñar sen cargar a súa equipaxe, estará dispoñible nos principais Roteiros do Camino de Santiago.
Ademais do Camiño Portugués desde Tui e A Guarda -incluída a Variante Espiritual-, o servizo de traslado de equipaxes estará dispoñible no Camiño Francés desde Roncesvalles e Somport, no Camiño do Norte desde Irún, no Camiño Primitivo desde Oviedo, no Camiño Inglés desde Ferrol, no Camiño de Inverno desde Ponferrada, na Vía da Prata-Camiño Sanabrés desde Ourense e no Camiño a Fisterra e Muxía.
O funcionamento do Paq Mochila é moi sinxelo. O carteiro pasará a partir das 8.00 da mañá para recoller a equipaxe dos peregrinos que solicitasen este servizo no aloxamento indicado e deixarao no seguinte antes de as 14.30 horas. O Paq Mochila pode contratarse na web http://www.paqmochila.com a través dun sinxelo formulario dispoñible en nove idiomas.
Outros servizos de Correos no Camiño de Santiago
Ademais do Paq Mochila, Correos conta cunha serie de servizos específicos pensados para facilitar aos peregrinos o seu percorrido. Entre eles están o Paq Peregrino, para o envío de maletas e paquetes a calquera punto do Camiño de Santiago. A contratación deste servizo tamén se pode facer online e permite escoller a recollida en propio domicilio ou nos aloxamentos do Camiño.
Para aqueles que decidan realizar o Camiño en bicicleta, Correos conta co Paq Bicicleta, un servizo de envío de bicicletas ao comezo do roteiro ou de volta ao finalizar o Camiño.
Ao chegar a Santiago de Compostela, os peregrinos teñen dispoñible o servizo de consigna que Correos ofrece na oficina de Rúa do Franco, 4, a dous minutos da Praza do Obradoiro. Este servizo está dispoñible de luns a domingo de 08.30 a 20.30 horas.
Toda a información sobre estes e outros servizos de Correos para o Camiño de Santiago está dispoñible na páxina web http://www.elcaminoconcorreos.com, que tamén ofrece un buscador con máis de 4.000 aloxamentos, descrición dos Roteiros Xacobeos máis populares e máis de 300 consellos de que ver e facer no Camiño por parte dos carteiros.
