Coa celebración dos Campionatos Galegos de menores rematou a tempada invernal de atletismo e o balance do grupo da Escola de Atletismo de Nigrán foi moi positivo, a pesar de non poder contar con Ainhoa Repáraz, o mascarón de proa do grupo, que está estudando en USA na Universidade de Ohio e obviamente non participou en ningún Campionato Galego.
O grupo remata o inverno con 4 metais nos distintos Campionatos Galegos e un récord galego, o segundo que acada o grupo de adestramento (outro o logrou Ainhoa Repáraz fai un par de anos nos 100 metros).
Adrián Bernárdez levouse dous ouros no Campionato de Galicia Sub 18 de pista cuberta ao vencer en 60 e 200. Con estes dous metais achégase á cifra da decena de metais ao longo da súa curta carreira deportiva.
Manuela González fixo o propio no galego Sub 20 en altura grazas a un salto de 1,55. A nigranesa leva desde o ano 2017, que foi prata no Campionato Galego Sub 12, conseguindo medallas en case todos os Campionatos de Galicia. A racha interrompeuse fai un par de anos debido a unha grave lesión nun nocello da que felizmente está recuperada. O cuarto metal do grupo foi Ricardo Cortizo ao ser bronce nos 200 do Campionato Galego absoluto, acadando deste xeito o seu primeiro metal nun galego absoluto.
Ademais das medallas tiveron unha boa colleita de marcas persoais durante a disputa dos Campionatos Galegos e varios postos de finalistas.
A isto hai que sumar a participación de Adrián Bernárdez e Ricardo Cortizo nos Campionatos de España. O gondomareño Adrián Bernárdez acadou posto de finalista en 200 no Campionato de España disputado en Sabadell e o nigransés Ricardo Cortizo foi semifinalista no seu primeiro Campionato de España absoluto. No caso de Ricardo hai que sumar que, sendo compoñente do Celta de Atletismo, fixo récord galego de 4×400.
A escola conta con 34 atletas de distintas idades e todos eles pertencen ao Celta de Atletismo. Cara a tempada estival, e unha vez rematado o curso escolar, o grupo vai recuperar a Ainhoa Repáraz.
