O Salón de Plenos do Concello de Baiona acolleu este mediodía o acto de entrega da distinción Honorífica do nomeamento de Cronista Oficial da Vila a Anxo Rodríguez Lemos. O alcalde, Jesús Vázquez Almuiña, fíxolle entrega do distintivo e comezou a súa intervención destacando que “hoxe con este acto facemos efectiva a entrega de tal merecida distinción sendo conscientes de que representa o sentir de moitos veciños”.
O rexedor no seu discurso recoñeceu a traxectoria profesional de Rodríguez Lemos e o merecido desta distinción. Destacou que “aínda sendo tan novo o noso veciño leva moito tempo investigando e divulgando a historia e a memoria de Baiona. O seu labor como historiador está intimamente ligado á túa terra natal: nacido na nosa parroquia de Santa Mariña de Baíña, o teu con Baiona é unha historia de amor. Anxo é un gran embaixador da nosa vila alá por onde vai. Sempre proxectando a imaxe de Baiona nas túas conferencias, ou a través dos teus artigos históricos publicados, mesmo en revistas internacionais”.
Vázquez Almuiña sinalou que “Anxo Rodríguez Lemos sábese practicamente de memoria os centenares de documentos que forman o arquivo de Baiona. Todo iso serviulle para poder exercer de guía en numerosas actividades. Visitas guiadas polo casco vello de Baiona, saídas aos petróglifos de Outeiro dos Lameiros, xeiras pola parroquia… como conferenciante e tamén para poñer en marcha varias exposicións históricas na Vila como a mostra etnográfica “O gremio de atadores e cordeleiros” que despois deste acto inauguraremos e que poderemos visitar no Hall desta Casa”.
O rexedor comentou que “segundo comentan os que o coñecen ben todo empezou cando a súa bisavoa, Aurelia Otero, contáballe os segredos da zona vella da vila. Isto levoulle a que a súa visita favorita fose ao arquivo antigo do Concello. A partir dos 15 anos, estando en secundaria, encargáronlle un traballo de toponimia da súa parroquia, Santa Mariña de Baíña, e a partir de aí, este baionés entregouse ao estudo da tradición oral de Baiona. O seu destino era inevitable: foise a Santiago a estudar Historia e, aos seus 22 anos, xa estaba graduado”.
Tamén quixo facer mención á súa traxectoria como estudante destacando o seu proxecto de fin de carreira, que versou sobre o Santuario de Santa Liberata e logrou a máxima puntuación. Cinco anos despois, no ano 2022, converteuse en Doutor “cum laude” (“con encomio ou honras”) pola súa tese doutoral sobre a orixe das romarías galegas no século XVII.
“Anxo, asumes o cargo de Cronista Oficial da Vila aos 29 anos. A idade significa que tes un longo camiño por diante. E a pesar diso tes experiencia e un amplo coñecemento da historia de Baiona. E sobre todo tes intacta a ilusión para traballar polo teu pobo, Baiona. Por iso hoxe felicitámosche e agradecémosche a aceptación do cargo, un cargo que non ten contrapartida económica e si obrigacións, como a realización da memoria anual “Crónica de Baiona”, na que se recollerán anualmente os principais acontecementos sociais, culturais ou políticos relacionados coa Vila”, continuou dicindo o alcalde.
Non quixo terminar sen facer unha mención especial para a súa familia. “Tamén quero felicitar e agradecer á túa familia a parte que lle corresponde deste nomeamento e porque eles sempre están aí”. “Desde a Alcaldía, desde o Concello apoiarémosche nas iniciativas que nos propoñas desde este importante posto, e que contribúan a que Baiona siga crecendo. Hoxe é un gran día para Baiona e tamén para ti. Aquí diante da túa familia, queremos, estimado Anxo, darche as grazas. Sen pedilo nin sequera insinualo xa entraches na Historia de Baiona, da túa Baiona”, concluíu Almuiña.
“Non podo comezar esta intervención sen manifestar a miña emoción e o meu agradecemento pola alta honra de sumar o meu nome a un cargo honorífico que por moitos méritos e desinteresado labor que teña realizado nestes anos non merece. Asumirei con vontade, entusiasmo e dignidade todo o compromiso que representa o aprobado sendo consciente de que o meu camiño profesional, evidentemente, terá un camiño distinto”, comezou dicindo Anxo Rodríguez Lemos na súa intervención.
“Gustaríame agradecer en primeiro lugar á miña familia, á miña noiva que me aguanta desde hai dous anos, a toda a xente que fixo posible que tendo 14 anos eu entrase a consultar a documentación histórica deste arquivo, sendo encargado del José Pousa e Delia Pérez Garbín, a toda a poboación de Baiona que durante todos estes anos axudoume nesta investigación, neste proceso que como sempre digo é gradual, a todas as autoridades aquí presentes, aos compañeiros do Instituto de Estudos Miñoráns, que cando tiña sede de libros e de cultura déronma, ao párroco de Baiona Don Manuel Salcidos, por sempre estar atento e deixarme documentacións inéditas da Colexiata de Santa María de Baiona e a todos vós pola vosa amizade”, concluíu o xa Cronista Oficial da Vila.
A Comisión de Honras e Distincións do Concello de Baiona propuxo a Anxo Rodríguez Lemos para a concesión da Distinción Honorífica de Cronista Oficial da Vila. A Corporación en Pleno quixo facerlle un recoñecemento público entregándolle tal distinción. Foi outorgada por unanimidade, algo inaudito nos tempos que corren, xa que, ninguén cuestionou nin por un momento se era ou non merecedor do mesmo. O último Cronista Oficial da Vila foi don Héctor Barreiro, que faleceu en 1996. Desde entón este posto está vacante. É certo que na recente historia de Baiona persoas como Antonio de Mauricio ou Avelino Sierra exerceron ese meritorio labor, pero non foron nomeados.
