O capítulo de fichaxes do Vigo-Rías Baixas para a tempada que arranca a próxima semana péchase con dous debutantes no pelotón Elite/Sub-23. Juan Hermosa e Mario Gordillo únense á estrutura presidida por José Luis Chamorro tras despuntar na súa etapa como júniors. O salmantino e o cántabro sitúan en quince o número de incorporacións efectuadas polo conxunto flúor para o seu novo e ilusionante proxecto.
As dúas vitorias logradas en 2023, unha na primeira etapa do Grande Prémio do Minho en Portugal e a outra no Gran Premio Concello de Valdefresno, son a carta de presentación de Juan Hermosa, cuxo talento tamén quedou de manifesto no Campionato de España de Contrarreloxo, proba que o ano pasado contou cunha participación de luxo e na que asinou a sexta praza. Rodador e escalador, o corredor que procede do Recambios Callejo opta por definirse como “moi loitador”.
Esta promesa da inesgotable canteira ciclista de Salamanca elixiu ao Vigo-Rías Baixas para a súa estrea como sub-23 porque “me gusta a forma de traballar do equipo. Están moi pendentes de nós e priorizan os estudos antes que a bicicleta, non só se fixan no que anda cada un. Outro aspecto que me chamou a atención é que ofrecen oportunidades por igual a todos os compoñentes do persoal”.
Con 18 anos tamén Mario Gordillo vai descubrir a categoría que exerce de antesala do profesionalismo. Residente en Cicera de Peñarrubia, a pasada tempada defendeu as cores do conxunto Isidoro San Justo despois de vivir dous anos en Irlanda, un país onde conseguiu un triunfo como júnior. “Considérome polivalente. O que mellor se me dan son as subidas grazas á miña explosividade”, apunta o cántabro.
Ás ordes de Jesús Blanco Villar e compartindo equipo con ciclistas que competiron a nivel profesional, o montañés confía en que “esta tempada vou aprender moito. Para seguir crecendo neste deporte non hai nada mellor que ter compañeiros con experiencia aos que poder preguntar as dúbidas que vaian xurdindo”.
Estes dous reforzos completan un persoal composto por dezanove corredores. Anteriormente o Vigo-Rías Baixas oficializara as altas de David González, Eusebio Pascual, Fran García Rus, Tomás Miralles, Iván Díaz, Álvaro García, Owen Lightfoot, Javier Sánchez, Dylan Jiménez, Juan Pablo Sossa, David Ordiz, Carlos García e Mario Díaz. Respecto á pasada campaña continúan Cristino Lanchas, Pelayo Alonso, Sergio Quevedo e Pepe Pérez. Este domingo os integrantes da escuadra olívica quedarán concentrados ata o vindeiro mércores no Hotel Cemar de Mondariz-Balneario.
