O Concello de Nigrán, a través do seu edil de Sanidade e o voluntario de Camos Suso Barros, retirou neste ano a cifra récord de 278 niños de vespa velutina dentro do municipio. Vázquez leva desactivado desde o ano 2018 preto de mil colmeas (270 en 2018; 183 en 2019; 175 en 2020 e 250 en 2022) e repartidas 2.500 trampas gratuítas entre a veciñanza xunto co seu líquido atraínte. “A explicación a esta cifra, moi similar á de 2018, débese a que ata agora tivemos unhas temperaturas moi suaves que favoreceron que os niños seguisen activos ata febreiro”, analiza Vázquez, edil e apicultor desde a infancia. A parroquia onde máis colmeas se concentraron no 2023 foi a de Nigrán con 62, seguida de San Pedro con 57, Camos con 47, Panxón con 33, Parada con 31, Priegue con 27 e Chandebrito con 21. Paralelamente á eliminación, o Concello ten repartido gratuitamente desde 2018 un total de 2.500 trampas de velutinas a todo aquel veciño que o solicita, sendo recomendable poñelas entre os meses de marzo a xuño, cando finaliza a hibernación.
“Desde marzo e ata xuño é cando resulta verdadeiramente efectivo poñer trampas nas árbores froiteiras ou zonas de flores porque é cando saen as raíñas da hibernación e a comer, en pleno verán xa non ten sentido porque están os niños construídos”, explica Alfonso, quen chegou a contabilizar nunha soa tarde 50 asiáticas capturadas nun aparello e 2.000 raíñas durante toda a primavera nunha ducia de trampas. “Cada raíña é un futuro niño, polo que as trampas evitan milleiros e milleiros”. Así, segundo os expertos, asegurar a eliminación da raíña é o método máis eficaz para o seu control, xa que evita a produción de novas e a formación de colmeas, que poden albergar ata 2.000 exemplares e 6.000 larvas. Sen embargo, o que máis pode axudar a reducir esta presencia son as temperaturas: “Necesitamos un inverno moi frío para reducir esta praga e iso cada vez é máis difícil debido ao cambio climático”, considera.
“A tenacidade e voluntariedade de Alfonso Vázquez é a que explica que en Nigrán se estea a controlar a presenza da avespa asiática, a súa dilixencia fai que cada semana reciba directamente chamadas de veciños pese a tratarse dunha competencia autonómica e non municipal”, sinala Juan González, alcalde de Nigrán, quen encomia o seu traballo. O método aplicado por Alfonso é sempre o mesmo: veleno ou ben a través dunha pértega que alcanza os 25 metros ou cunha escopeta marcadora que dispara bólas biodegradables que chegan ata os 50 metros de altura. Todos estes aparellos son propiedade do Concello, adquiridos para este fin.
