Juan González, alcalde de Nigrán, acompañado de Bibiana Peixoto, concelleira de Benestar Social, visitou o centro de Avelaíña para coñecer de primeira man todo o traballo realizado dentro do programa “Vivindo Saúde” que financia o Concello. Este programa pioneiro no Val Miñor dirixido a persoas con enfermidade mental, ten como obxectivo lograr máis autonomía e integración social. Así o explicaba no acto de presentación a educadora social encargada do programa. Os usuarios, pola súa banda, tamén explicaron a súa experiencia e os beneficios que lles achegou devandito programa.
As barreiras ás que se enfronta a diario unha persoa con enfermidade mental son invisibles. O que parece sinxelo para calquera persoa, pode converterse nunha odisea para quen ten unha enfermidade mental. Hai quen non pode levantarse da cama; outros acumulan roupa sen estrear ou non son capaces de xestionar a súa economía; tamén hai persoas ás que a súa enfermidade limítalles para comunicarse e ter vida social.
Este servizo que ofrece Avelaíña “non ten nada que ver coa axuda a domicilio”. A persoa á que se acompaña é a protagonista, non unha mera receptora do servizo. “Se non saben cociñar ensinámoslle; se non se organizan para facer a compra mostrámoslle como facer unha lista ou lle acompañamos ao supermercado, ao banco ou a realizar unha xestión administrativa”, explica Leticia Vieitez, a educadora social, contratada especificamente para este programa.
O alcalde, pola súa banda, eloxiou o labor da asociación e anunciou o seu compromiso de seguir colaborando con esta entidade, referente en saúde mental.
