O Campionato Galego de Rallyes clausurou a súa tempada 2023 no Rallye Ribeira-Ría de Arousa, onde todo o equipo AMF Motorsport tiña a esperanza posta en terminar o ano da mellor maneira posible e así redondear unha campaña espectacular onde demostraron o seu nivel en todas e cada unha das citas.
Aos mandos do Fabia R5 e con Avelino Martínez no asento da dereita, Meira saíu ao ataque desde os primeiros compases da cita arousá, facendo fronte ás delicadas condicións do asfalto, con zonas bastante molladas e escapándose na cabeza da clasificación xeral. Aínda que a meteoroloxía continuou sendo variable, o piloto gondomarense non se amedrentou e concluía a primeira etapa con algo máis dunha vintena de segundos no peto sobre o seu máis directo perseguidor.
Ao día seguinte, coa retirada do seu máis próximo rival na primeira cronometrada, Meira xa gozaba de case un minuto de renda no liderado, unha vantaxe que foi ampliando sen baixar o ritmo ata o final, asinando todos e cada un dos scratchs disputados. Así chegou a cuarta vitoria absoluta consecutiva para o equipo que non fai máis que referendar o bo nivel que están a demostrar, que aúna velocidade e regularidade, nun conxunto onde todo roda en consonancia. Ademais, Meira logrou o pleno de vitorias na Copa Top Ten Pirelli Driver A e o Supercampionato Galego R5, polo que ningún vehículo desta categoría puido vencer ao Fabia R5 de AMF Motorsport en toda a tempada.
O piloto de Vincios deixaba as súas impresións á súa chegada ao parque pechado: “Foi un rallye complicado, onde o tempo parecía que ía acompañar pero onde terminou chovendo nalgún momento en todas as pasadas así que as condicións foron difíciles. Un rallye onde nolo tomamos con filosofía, atacando sobre todo nas primeiras pasadas e estamos moi contentos do noso éxito. Teño que dedicar o triunfo aos patrocinadores que nos permitiron competir un ano máis ao máis alto nivel e quero dar as grazas ao equipo polo seu gran traballo ao longo de toda a tempada”.
AMF Motorsport culmina así unha magnífica tempada 2023, con moita ilusión posta e ánimos renovados para que dentro duns meses arranque a próxima campaña.
