O Concello de Nigrán mantén xa engalanados con máis de 200 plantas de crisantemos de cores e brezo os seus dous únicos cemiterios municipais, o de Parada e Nigrán (San Fiz), de cara á festividade de Todos os Santos. Adicionalmente, onte quedou rematada a limpeza especial das lousas do chan. Ambos os dous son os dous únicos camposantos de Nigrán de xestión municipal.
Precisamente, na tarde de onte o grupo local Teatro do Ar ofreceu unha visita teatralizada ao de San Fiz e hoxe farao ao de Panxón (de propiedade privada), ambos coas prazas xa esgotadas. “O obxectivo é poñer en valor os camposantos desde o punto de vista patrimonial e que a veciñanza coñeza a nosa Historia a través dos nosos mortos”, resume o rexedor, quen considera que “os dous cemiterios municipais están en perfecto estado durante todo o ano pero en Todos os Santos hai que estar á altura e aumentar ese esforzo porque é cando máis visitas reciben”.
