Nigrán abre o prazo de inscrición para as actividades socio-deportivas e culturais

O Concello de Nigrán abre o prazo de inscrición para as actividades socio-deportivas e culturais 2023-2024. 570 persoas se beneficiarán das actividades deportivas, que van dende aeróbic, ioga, tai chi, surf, pilates, zumba, tenis, marcha nórdica, actividade deportivas e adestramento funcional. 300 persoas poderán participar nas actividades culturais de música, cerámica, pintura, gravado, torno e teatro e se incorpora cómic.

As inscricións serán os días 12 e 13 de setembro para o alumnado inscrito no curso 2022-2023 nunha actividade estando empadroado no Concello de Nigrán (e que segue a estalo) e que desexe continuar na mesma actividade e no mesmo horario no curso 2023-2024. Esta inscrición poderá realizarse presencialmente no Auditorio do Concello de Nigrán nos días sinalados en horario de 9:00 a 13:00 horas, ou telematicamente na web http://www.actividadesnigran2023.es (calquera dos dous días posto que a praza está gardada), agás música e tenis que será presencial. Os días 18 e 19 de setembro inscribiranse os empadroados no Concello de Nigrán que inicien actividades este curso (nas prazas vacantes). Presencialmente no Auditorio do Concello de Nigrán en horario de 9:00 a 13:00 horas. As persoas non empadroadas poderán inscribirse, sempre que haxa prazas dispoñibles, o 25 e 26 de setembro presencialmente no Auditorio do Concello de Nigrán en horario de 9:00 a 13:00 horas. No momento de inscribirse realizarase o pago (con tarxeta, mediante transferencia ou pago na oficina bancaria), non quedando garantida a praza ata que se abone.

As actividades comezarán a semana do 2 de outubro de 2023 e rematarán o 31 de maio do 2024 (8 meses). O prezo das actividades é de 75€ para as persoas empadroadas en Nigrán e de 100€ para os non empadroados (Nos importes inclúese o seguro obrigatorio de accidentes). A actividade de Tenis de Adultos dos sábados terá un prezo de 37,5€ para as persoas empadroadas en Nigrán e de 50€ para os non empadroados. A actividade de Marcha Nórdica ten unha duración de 3 horas semanais (dúas sesións de 1,5 horas) e terá un prezo de 112,50€ para as persoas empadroadas en Nigrán e de 150€ para os non empadroados. Terán dereito a unha bonificación do 50% sobre o prezo público de 50€, 100€ e 150€ as persoas empadroadas en Nigrán que se atopen nunha situación de necesidade ou de dificultade económico – financeira e que pertenzan a unha unidade familiar.

Acceso gratuíto sala de fitness

Calquera persoa maior de idade matriculada nas actividades deportivas 2023/2024 poderá inscribirse gratuitamente para o uso da Sala de Fitness do Pavillón. O número de prazas está condicionado polo número de máquinas e elementos propios da sala. Cada persoa só poderá asistir dúas horas semanais a esta actividade e o exercicio estará controlado por un monitor en todo momento. Os interesados deberán anotarse o primeiro día da actividade (3 de outubro) directamente no Pavillón co monitor, as peticións serán atendidas por orde de inscrición.

“Unha amplísima oferta de actividades deportivas e culturais dirixidas a todas as idades, e preto de 900 persoas, nas que se consolidan Teatro e Marcha Nórdica e se incorpora Cómic despois do éxito entre a xente máis nova dos cursos que se levaron a cabo durante o verán” declara Juan González, Alcalde de Nigrán.