O Alcalde de Baiona, Jesús Vázquez Almuiña, recibiu esta semana á Cónsul Xeral de Cuba para Galicia, Asturias e Cantabria, Ingrid Izquierdo Sterling. Foi o primeiro contacto entre a Cónsul cubana e o alcalde baionés. Os temas a tratar nesta visita son os ligados ao irmandamento que desde hai 22 anos ten a Real Vila con Rafael Freyre, na provincia de Holguín, Cuba.
Os representantes consulares de Cuba sempre estiveron presentes en todos os actos ligados ao mundo iberoamericano, en especial o 12 de outubro e a Arribada da Carabela Pinta. Na reunión falouse de potenciar os lazos entre os dous pobos, especialmente nos ámbitos cultural e social, cunha aposta clara por parte da Cónsul para incrementar a súa presenza na Arribada.
“Baiona leva moitos anos sendo a ponte entre América e Galicia e vai ser un dos seus piares de futuro”, indicoulle o Alcalde á Cónsul en aras da colaboración mutua. Acordouse planificar reunións periódicas entre as dúas delegacións para avanzar neste proxecto común.
