O anfiteatro do Bosque da Lingua da Mancomunidade de Montes de Couso pecha o mes de xullo cun recital de poesía. Este domingo 30 de xullo o Bosque da Lingua lucirá coas voces poéticas do escritor Fran Fernández Davila de Panxón, do Académico da RAG Gonzalo Navaza, dos multipremiados Manuel Forcadela, Cristal Méndez, Pepe Cáccamo e Xavier Baixeras, e da escritora dos paseos do Miñor Soledad García. Os actos comezarán ás 20:30 horas no anfiteatro do Bosque da Lingua en Couso.
A Mancomunidade de Montes de Couso creou este espazo natural de 40.000 m2 entre carballos, castiñeiros, camelios, teixos e bidueiros nos que se recollen versos a través dun código QR das mellores composicións da nosa lingua: Castelao, Rosalía, Xela Arias ou Victoriano Taibo. As últimas incorporacións corresponden aos poetas Marta Dacosta, Gonzalo Navaza, Xavier Baixeras, Pepe Cáccamo e os dedicados a Eduardo Pondal e Xosé Luis Méndez Ferrín.
