O Concello de Nigrán dispón dun novo leiraparking público e gratuíto ante o cese do alugueiro do actual na rúa Torriña. Este outro aparcadoiro é nun terreo municipal e dispón de 1.200 m2, atópase na rúa Vilaméan (a menos de 200 metros da Casa Consistorial e onde se situaba precisamente o primeiro leiraparking municipal que tivo o Concello).
“Lamentamos as molestias que ocasionou este peche durante catro días e dispomos de alternativa nun espazo municipal igual de céntrico”, explica González, quen avanza que “adicionalmente desde o Concello estamos na procura de novos espazos tamén céntricos e nun espazo de máis de 2.500m2”.
“Ter un espazo gratuíto de aparcamento disuasorio no centro urbano de Nigrán é algo indispensable porque beneficia a toda a veciñanza e repercute directamente no comercio da zona, máxime agora en tempada estival que multiplicamos a poboación e se agrava o problema de aparcar”, engade.
Este leiraparking súmase ao aparcadoiro público e 100% gratuíto da Ramallosa (rúa Argonautas, ao carón da piscina) que o goberno local conseguiu remunicipalizar mediante a súa xestión directa e abrir en xaneiro de 2022 tras 5 anos pechado. Ademais, o rexedor subliña o Nigránbus como outra medida de mobilidade sostible, operando por vez primeira este verán e que conecta as parroquias do interior cos principais núcleos urbanos, “unha medida que busca precisamente que deixemos o coche na casa e nos movamos en transporte colectivo”, sintetiza.
