O alumnado e profesorado do IES Primeiro de Marzo de Baiona convoca a todas as persoas que o desexen a concentrarse diante do IES ás 11:30 horas de mañá venres 16 de xuño contra a privatización e desmantelamento da FP Galega.
O Sindicato de Traballadoras e Traballadores do Ensino de Galiza – STEG – quere denunciar o salvaxe recorte que o goberno do Partido Popular está levando a cabo na Formación Profesional e que afecta tanto á calidade educativa como a estabilidade laboral de profesores e profesoras. “O peche de 6 aulas no CIFP A Xunqueira é soamente unha mostra da política privatizadora e de recortes que está a levar a cabo un goberno que, lonxe de falar coa comunidade educativa, péchase en si mesmo como se dun búnker se tratase”.
O IES de Chapela, o CIFP da Xunqueira, o IES das Fontiñas, son soamente algúns dos centros afectados e que se verán afectados pola nova situación. “A redución da oferta formativa presencial e a súa transformación en a distancia, resta sen lugar a dúbidas, calidade ao proceso educativo e deixa sen posibilidade de matrícula a lo menos 100 alumnos e alumnas. Ademais, non podemos esquecer que o modelo de ensino a distancia sube as ratios de alumno por profesor, polo que as contratacións de docentes descenderán”.
O STEG fai un chamamento á altura de miras de tódalas organizacións sindicais, docentes e de alumnado, para artellar unha resposta que leve á caída da actual directora xeral de FP.
O STEG anima ao profesorado a mobilizarse contra uns recortes que se anuncian a poucos días de que rematen as clases e polo tanto tentando aproveitar a desmobilización dos afectados e afectadas. O STEG garántelle á Xunta que a non paralización do actual proceso de recortes, que a non asunción da recuperación do horario lectivo de 18 e 21 horas, que o non recoñecemento do soldo de xullo e agosto ao persoal interino, é un caldo de cultivo perfecto para a apertura dun importante ciclo de mobilizacións do corpo docente.
