O resultado deportivo quedou nun segundo plano na Vigo Copa España celebrada este domingo. Un accidente sufrido por unha xuíza árbitra e o condutor da súa motocicleta obrigou a parar durante unha hora a última xornada do certame estatal e a ascender de forma neutralizada o Monte Aloia, porto de 1ª categoría e chamado a realizar unha importante criba na loita pola vitoria. A pesar da gravidade do contratempo, afortunadamente a vida dos dous feridos non corre perigo e na continuación da carreira, con algo máis de 60 quilómetros por diante, impúxose o guatemalteco Sergio Chumil (Padronés-Cortizo), que subiu cunha marcha máis que o resto o “muro” final da Madroa.
A terceira edición da cita organizada polo Vigo-Rías Baixas arrancou desde a Praza do Rei con 195 participantes e un sentido minuto de silencio. Despois do corte de cinta realizado por José Luis Chamorro, presidente do club anfitrión; Manel Fernández, concelleiro de Deportes; Gorka Gómez, deputado de Deportes da Deputación de Pontevedra; e Óscar Sánchez, directivo da Federación Ciclismo Galego, rendeuse homenaxe a Arturo Gravalos, ciclista falecido nos últimos días. O seu director no Eolo Kometa, Rafa Díaz Justo, e os seus compañeiros de equipo recibiron o agarimo de toda a caravana desta competición.
A xornada máis esixente do calendario da Copa de España Elite-Sub23 presentaba un percorrido de 180 quilómetros, con seis portos de montaña e un desnivel positivo acumulado de máis de 4.000. Neste espectacular trazado polo sur da provincia de Pontevedra viviuse unha primeira metade de carreira en grao sumo entretida e o mesmo ciclista coroou na cabeza as tres primeiras ascensións puntuables. O porriñés Sergio Lorenzo (Laboral Kutxa) pasou primeiro polas cimas do alto de 1ª categoría da Groba (km 26) e dos de 2ª do Monte Alba (km 75) e O Galiñeiro (km 82), o que acabaría por outorgarlle a camisola do Gran Premio da Montaña Mapfre.
Á vez que se consolidaba unha numerosísima escapada composta por 36 unidades, outro corredor lograba un “triplete”. Juan Pedro Lozano (Valverde Team) adxudicábase os Premios Especiais do Concello de Gondomar (km 56), do Concello de Nigrán (km 63) e do Polígono da Pasaxe (km 78).
Parada obrigada
A fuga, sen demasiado entendemento entre os seus integrantes, roldaba os dous minutos de vantaxe na aproximación ao Monte Aloia, porto de 1ª categoría. Todo apuntaba a un cambio de ritmo do pelotón dos favoritos nas súas ramplas, pero o accidente que tivo lugar ao redor do km 90 abortou a previsible batalla. As ambulancias trasladaron aos feridos desde as inmediacións de Tui ata o hospital Álvaro Cunqueiro e mentres non se reincorporaron á caravana da carreira non se puido renovar a competición.
Durante esa paréntese dunha hora os ciclistas subiron e baixaron o Monte Aloia de maneira neutralizada. Restaban 65 quilómetros cando se deu a segunda saída do día, respectando as diferenzas previas á interrupción. Primeiro arrancaron os 36 fuxidos, despois un trío que marchaba intercalado e acto seguido o pelotón. A reunificación non tardaría en producirse.
Unha vez absorbida a fuga, sucedéronse os ataques e unha das escapadas aproveitouna Jaume Guardeño (Caja Rural-Alea) para puntuar primeiro no alto de Fonte dos 100 Anos, de 2ª categoría. O intento de escapada máis consistente no tramo final protagonizárono Ander Ganzabal (Laboral Kutxa) e Samuel Fernández (Caja Rural-Alea). A aventura deste dúo concluíu dentro dos últimos 3 quilómetros, no arranque do “muro” que conducía a meta.
Subida final
Arnau Gilabert (Eolo Kometa) lanzou a ascensión á Madroa e atopouse a resposta de Sergio Chumil. O guatemalteco, segundo o ano pasado na mesma chegada, non esperou ao último quilómetro. O seu cambio de ritmo resultou demoledor e ninguén lle puido facer fronte nas pendentes que nalgúns puntos superan o 10% de desnivel. O corredor sub23 do equipo de Padrón venceu con 15 segundos de vantaxe sobre Hugo Aznar (Finisher) e un segundo máis tarde cruzaron a liña de Marc Cabedo (Telco’m), que completou o podio, e Viacheslav Ivanov (MP Group). A quinta praza correspondeu a David González (Bicicletas Rodríguez) e a sexta a Asier González (Vigo-Rías Baixas), o mellor clasificado do equipo anfitrión.
A Vigo chegou como gañador matemático da Copa o sub23 uruguaio Thomas Silva (Caja Rural), que fixo oitavo, e en xogo estaba o outro camisola do certame estatal. Sergio Trueba (Gomur) conservou o liderado elite no seu duelo con David Domínguez (Zamora Namora). O Gomur tamén certificou nesta última xornada o triunfo na xeral por equipos.
A Copa de España baixou o pano na Madroa co desexo de que os dous accidentados na súa clausura recupérense canto antes e fágano da mellor maneira posible.
