Novamente, o equipo AMF Motorsport deixou moi boas sensacións no seu paso polo Rallye Mariña Lucense, terceira cita do Campionato Galego de Rallyes. Do mesmo xeito que sucedeu nas citas anteriores, o binomio formado por Alberto Meira e Avelino Martínez fixo un traballo impecable, e aínda que foi imposible dar caza ao WRC, dominaron con autoridade fronte aos da súa categoría.
Tras as dúas primeiras especiais, Meira deitábase o venres con case 20 segundos de vantaxe no que respecta ao Supercampionato Galego R5 e a Copa Top Ten Pirelli A. Unha renda que iría engrosando co paso dos tramos, ata os 50 segundos no ecuador da proba. A xornada de tarde o sábado ía ser máis conservadora, administrando a distancia e acertando coa equitación dos seus compostos Pirelli para unhas condicións moi cambiantes.
Finalmente, a terceira vitoria consecutiva en ambas as dúas copas de promoción íase a mans do piloto gondomarense, que redondeaba outra fantástica actuación, chegando ao parque pechado de Viveiro con case minuto e medio de diferenza respecto ao seguinte clasificado.
Meira mostrábase moi contento tras un inicio de tempada sobresaliente: “Obxectivo cumprido unha vez máis, gañando a Copa R5 Pirelli – Recalvi, tentamos estar o máis arriba posible na clasificación por detrás do WRC que resultou novamente inalcanzable, e aínda así puidemos facer dous scratchs absolutos. Felicitar á organización por facer un rallye moi bonito e moi ben deseñado. Aínda que o tempo non acompañou, atopámonos cómodos en todas as condicións. Felicitar ao equipo polo seu bo facer durante toda a fin de semana, cun coche que se portou á perfección”.
A próxima cita do calendario será o Rallye de Pontevedra, a disputarse o 2 e 3 de xuño con epicentro na localidade de Sanxenxo.
